ബെംഗളൂരു: വോട്ടർപട്ടിക പുതുക്കലുമായി ബന്ധപ്പെട്ട സ്പെഷ്യൽ ഇൻ്റെൻസീവ് റിവിഷൻ (SIR) നടപടികളിലെ ക്രമക്കേടുകൾ ആരോപിച്ചും, മുഖ്യ തിരഞ്ഞെടുപ്പ് കമ്മീഷണർ (CEC) ഗ്യാനേഷ് കുമാറിന്റെ രാജി ആവശ്യപ്പെട്ടും കർണാടകയിൽ ഇന്ത്യാ മുന്നണി വൻ പ്രതിഷേധം സംഘടിപ്പിച്ചു. 2026 നവംബർ 5-ന് ബെംഗളൂരുവിലെ ഫ്രീഡം പാർക്കിലായിരുന്നു സംസ്ഥാനതല പ്രതിഷേധ റാലി നടന്നത്. കോൺഗ്രസ് ഉൾപ്പെടെയുള്ള പ്രതിപക്ഷ കക്ഷികളുടെ നേതാക്കളും പ്രവർത്തകരും പങ്കെടുത്ത സമരത്തിൽ തിരഞ്ഞെടുപ്പ് കമ്മീഷന്റെ നടപടികൾക്കെതിരെ വിമർശനമുയർന്നു.
വോട്ടർപട്ടിക പരിഷ്കരണത്തിന്റെ പേരിൽ അർഹരായ വോട്ടർമാരുടെ പേരുകൾ ഒഴിവാക്കപ്പെടാൻ സാധ്യതയുണ്ടെന്നും നടപടിക്രമങ്ങളിൽ സുതാര്യത ഉറപ്പാക്കണമെന്നും പ്രതിഷേധക്കാർ ആവശ്യപ്പെട്ടു. എസ്.ഐ.ആർ നടപടികൾ റദ്ദാക്കണമെന്നും മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കണമെന്നും സമരത്തിൽ ആവശ്യമുയർന്നു. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ ജയിലിലടയ്ക്കുന്ന രീതിയിലുള്ള പ്രതീകാത്മകമായ പ്രതിഷേധവും റാലിയിൽ അരങ്ങേറി.
#WATCH | Bengaluru, Karnataka: The INDIA bloc holds a state-level protest rally at Freedom Park, demanding the immediate resignation of Chief Election Commissioner Gyanesh Kumar over alleged electoral roll manipulation. Congress leader Dinesh Gundu Rao also present there. https://t.co/myBM2ruNtN
— ANI (@ANI) November 5, 2026
കർണാടക മുഖ്യമന്ത്രി ഡി.കെ. ശിവകുമാർ, മുൻ മുഖ്യമന്ത്രി സിദ്ധരാമയ്യ, കെ.പി.സി.സി പ്രസിഡന്റ് ബി.കെ. ഹരിപ്രസാദ്, കോൺഗ്രസ് നേതാവ് ദിനേഷ് ഗുണ്ടുറാവു എന്നിവരും സി.പി.ഐ(എം), സി.പി.ഐ, സി.പി.ഐ(എം.എൽ), ഫോർവേഡ് ബ്ലോക്ക്, സമാജ്‌വാദി പാർട്ടി തുടങ്ങിയ മുന്നണിയിലെ മറ്റ് കക്ഷി നേതാക്കളും ചലച്ചിത്ര താരം പ്രകാശ് രാജും പ്രതിഷേധത്തിൽ പങ്കെടുത്തു.
മുഖ്യ തിരഞ്ഞെടുപ്പ് കമ്മീഷണറെ നിയമിക്കുന്ന നടപടിക്രമങ്ങളിൽ കൂടുതൽ സുതാര്യത വേണമെന്നും തിരഞ്ഞെടുപ്പ് കമ്മീഷന്റെ പ്രവർത്തനങ്ങളിൽ ഉത്തരവാദിത്വം ഉറപ്പാക്കണമെന്നും നേതാക്കൾ ആവശ്യപ്പെട്ടു. എസ്.ഐ.ആറുമായി ബന്ധപ്പെട്ട് ഉയർന്ന ആശങ്കകൾ പരിഹരിക്കാൻ തിരഞ്ഞെടുപ്പ് കമ്മീഷൻ വ്യക്തമായ വിശദീകരണം നൽകണമെന്നും അവർ പറഞ്ഞു.
ബെംഗളൂരുവിലെ പ്രതിഷേധത്തിന് പിന്നാലെ കർണാടകയിലെ വിവിധ ജില്ലകളിലും താലൂക്കുകളിലും സമരം വ്യാപിപ്പിക്കാനാണ് ഇന്ത്യാ മുന്നണിയുടെ തീരുമാനം.
SUMMARY: INDIA bloc protest against the SI at Freedom Park
