ബെംഗളൂരു: നഗരത്തിലെ മാലിന്യശേഖരണ സംവിധാനം കൂടുതൽ കാര്യക്ഷമമാക്കുന്നതിനായി നാല് നിയമസഭാ മണ്ഡലങ്ങളിൽ പുതിയ സംവിധാനം നവംബർ അവസാനത്തോടെ നടപ്പാക്കും. ഗോവിന്ദരാജനഗർ, മഹാലക്ഷ്മി ലേഔട്ട്, വിജയനഗർ, ചാമരാജ്പേട്ട് മണ്ഡലങ്ങളിലാണ് ആദ്യഘട്ടത്തിൽ പുതിയ വീടുതോറുമുള്ള മാലിന്യശേഖരണ സംവിധാനം ആരംഭിക്കുന്നത്.
പുതിയ സംവിധാനത്തിന്റെ ഭാഗമായി മാലിന്യശേഖരണ വാഹനങ്ങളിൽ ജി.പി.എസ്. സംവിധാനം നിർബന്ധമാക്കും. വാഹനങ്ങൾ ഏതെല്ലാം റോഡുകളിലൂടെ സഞ്ചരിച്ചു, ഏതൊക്കെ പ്രദേശങ്ങളിൽ മാലിന്യം ശേഖരിച്ചു തുടങ്ങിയ വിവരങ്ങൾ ജി.പി.എസ്. വഴി നിരീക്ഷിക്കും. ശേഖരണത്തിന്റെ യഥാർഥ രേഖകളുടെ അടിസ്ഥാനത്തിലായിരിക്കും കരാറുകാർക്ക് പണം നൽകുക.
നിലവിലെ സംവിധാനത്തിൽ മാലിന്യശേഖരണ കരാറുകളുമായി ബന്ധപ്പെട്ട് വിവിധ പരാതികൾ ഉയർന്നുവരുന്ന സാഹചര്യത്തിലാണ് പുതിയ പരിഷ്കാരം. വാഹനങ്ങൾ എല്ലാ പ്രദേശങ്ങളിലും എത്തുന്നുണ്ടോ, വീടുകളിൽനിന്ന് കൃത്യമായി മാലിന്യം ശേഖരിക്കുന്നുണ്ടോ തുടങ്ങിയ കാര്യങ്ങൾ നിരീക്ഷിക്കാൻ പുതിയ സംവിധാനം സഹായിക്കുമെന്നാണ് അധികൃതരുടെ പ്രതീക്ഷ.
ജി.പി.എസ്. വിവരങ്ങൾ ഉപയോഗിച്ച് വാഹനങ്ങളുടെ സഞ്ചാരവും പ്രവർത്തനവും പരിശോധിക്കാനാകും. മാലിന്യം ശേഖരിക്കാത്ത പ്രദേശങ്ങൾ കണ്ടെത്താനും സേവനത്തിലെ വീഴ്ചകൾക്ക് ഉത്തരവാദികളായ കരാറുകാർക്കെതിരെ നടപടി സ്വീകരിക്കാനും ഇതിലൂടെ സാധിക്കുമെന്നാണ് വിലയിരുത്തൽ.
ആദ്യഘട്ടത്തിലെ നാല് മണ്ഡലങ്ങൾക്ക് പിന്നാലെ ചിക്ക്പേട്ട് മണ്ഡലത്തിലും ഡിസംബറിൽ പുതിയ സംവിധാനം നടപ്പാക്കാനാണ് ലക്ഷ്യമിടുന്നത്. തുടർന്ന് നഗരത്തിലെ മറ്റ് പ്രദേശങ്ങളിലേക്കും പദ്ധതി വ്യാപിപ്പിക്കും.
SUMMARY: New system for garbage collection in Bengaluru; It will be implemented by the end of November
