ബെംഗളൂരു: രാജ്യത്തെ നടുക്കിയ ബെംഗളൂരു കൂട്ടക്കൊലപാതക കേസിൽ നിർണായക പുരോഗതി. കൊല്ലപ്പെട്ട രണ്ടുപേരുടെ മൃതദേഹങ്ങൾ കൂടി തമിഴ്‌നാട്ടിലെ സേലം ജില്ലയിലുള്ള വനാതിർത്തിയിൽ നിന്ന് പോലീസ് കണ്ടെടുത്തു. പ്രതി എസ്. ഇന്ദുശേഖറിന്റെ ഭാര്യ സുനിത, അമ്മായിയമ്മ രൂപവതി എന്നിവരുടെ മൃതദേഹങ്ങളാണ് കണ്ടെത്തിയത്. ഇതോടെ കേസിൽ ഇതുവരെ കണ്ടെടുത്ത മൃതദേഹങ്ങളുടെ എണ്ണം മൂന്നായി ഉയർന്നു.
വെള്ളിയാഴ്ച രാത്രി വൈകി പ്രതിയുമായി സംഭവസ്ഥലത്തെത്തി പോലീസ് നടത്തിയ തെളിവെടുപ്പിലാണ് മൃതദേഹങ്ങൾ തിരിച്ചറിഞ്ഞത്. മൃതദേഹങ്ങൾ ഔദ്യോഗികമായി സ്ഥിരീകരിക്കുന്നതിനും തുടർ നിയമനടപടികൾക്കുമായി കൊല്ലപ്പെട്ടവരുടെ 12 അംഗ കുടുംബാംഗങ്ങളുടെ സംഘം സേലത്തേക്ക് തിരിച്ചു.
കൊലപാതകം ആസൂത്രിതമായി; പണം കണ്ടെത്തിയത് സ്വർണം വിറ്റ്
ഒക്ടോബർ 14-നാണ് ഇന്ദുശേഖർ ഭാര്യ സുനിതയെ കൊലപ്പെടുത്തിയത്. തൊട്ടടുത്ത ദിവസം രൂപവതിയെ ഫോണിൽ വിളിച്ച് അത്താഴവിരുന്നിന് ക്ഷണിച്ച് വീട്ടിൽ വരുത്തുകയായിരുന്നു. തുടർന്ന് ഉറക്കഗുളിക നൽകി മയക്കിയ ശേഷം കല്ലുകൊണ്ട് തലയ്ക്കടിച്ചാണ് കൊലപ്പെടുത്തിയത്.
കൊലപാതകത്തിന് ശേഷം ബെംഗളൂരു, മംഗളൂരു, ചെന്നൈ, നന്ദി ഹിൽസ് തുടങ്ങിയ സ്ഥലങ്ങളിൽ പ്രതി സഞ്ചരിച്ചതായി അന്വേഷണസംഘം കണ്ടെത്തി. ഇരകളിൽ നിന്ന് കവർന്ന സ്വർണാഭരണങ്ങൾ വിറ്റും പണയം വെച്ചുമാണ് പ്രതി യാത്രയ്ക്കും ഇന്ധനത്തിനുമുള്ള പണം കണ്ടെത്തിയത്.
ദുർഗന്ധം വമിക്കാതിരിക്കാൻ ഉപയോഗിച്ചിരുന്നതാണോ എന്ന് സംശയിക്കുന്ന തരത്തിൽ ആറോളം പെർഫ്യൂം കുപ്പികൾ ഇന്ദുശേഖറിന്റെ കാറിൽ നിന്ന് പോലീസ് കണ്ടെടുത്തിട്ടുണ്ട്. കേസിൽ ഒക്ടോബർ 29-ന് കൊല്ലപ്പെട്ട ഏഴുവയസുകാരൻ പുനീതിന് തലയിലും നെറ്റിയിലുമായി നാല് മാരകമായ മുറിവുകൾ ഉള്ളതായി പോസ്റ്റ്മോർട്ടം റിപ്പോർട്ടിൽ സ്ഥിരീകരിച്ചിട്ടുണ്ട്.
മറ്റൊരു ജീവൻ രക്ഷപ്പെട്ടത് തലനാരിഴയ്ക്ക്
ബെംഗളൂരുവിലെ അൾസൂരു ഗേറ്റിൽ വെച്ചാണ് പ്രതിയായ ഇന്ദുശേഖറിനെ പോലീസ് സാഹസികമായി പിടികൂടിയത്. ഈ സമയത്ത് കൊല്ലപ്പെട്ട ദമ്പതികളുടെ 10 വയസുള്ള മകനും ഇയാളുടെ കാറിലുണ്ടായിരുന്നു. മാതാപിതാക്കൾ തീർഥാടനത്തിന് പോയതാണെന്ന് വിശ്വസിപ്പിച്ചാണ് കുട്ടിയെ ഇയാൾ ഒപ്പം കൂട്ടിയത്. ഈ കുട്ടിയെയും കൊലപ്പെടുത്താൻ പദ്ധതിയിട്ടിരിക്കെയാണ് പോലീസ് ഇയാളെ വലയിലാക്കിയതും കുട്ടിയെ സുരക്ഷിതമായി രക്ഷപ്പെടുത്തിയതും.
ദീർഘകാലമായുള്ള കുടുംബവഴക്കും ഭാര്യയുടെ ബന്ധുക്കളോടുള്ള വിരോധവുമാണ് ഏഴുപേരുടെ കൊലപാതകത്തിലേക്ക് നയിച്ചതെന്നാണ് പോലീസിന്റെ പ്രാഥമിക നിഗമനം. ഇന്ദുശേഖറിന്റെ ഭാര്യാ സഹോദരന്മാരായ ശിവകുമാർ (30), ശങ്കർ (40) ശിവകുമാറിന്റെയും ശങ്കറിന്റെയും ഭാര്യമാരായ ദിവ്യ, നളിനി എന്നിവരുടെ മൃതദേഹങ്ങളാണ് ഇനി കണ്ടെടുക്കാനുള്ളത്. നളിനിയെ കാണാനില്ലെന്ന് കാണിച്ച് അമ്മ തുംഗമ്മ ശ്രീരാമപുരം പോലീസ് സ്റ്റേഷനിൽ നൽകിയ പരാതിയാണ് ഈ കൊലപാതക പരമ്പര പുറത്തുകൊണ്ടുവന്നത്. പോലീസ് ഇന്ദുശേഖറിനെ അറസ്റ്റ് ചെയ്യുകയും, കോടതി ഇയാളെ 12 ദിവസത്തെ പോലീസ് കസ്റ്റഡിയിൽ വിടുകയും ചെയ്തു.
‘താനവരതി’ എന്ന ക്രൈംമാസികയുടെ നടത്തിപ്പുകാരൻ കൂടിയാണ് രാജാജി നഗർ സ്വദേശിയായ ഇന്ദുശേഖർ. കേസിൽ പ്രതിയെ സഹായിച്ചതായി സംശയിക്കുന്ന ഇയാളുടെ 17 കാരിയായ മകളുടെ പങ്കിനെക്കുറിച്ചും അന്വേഷണസംഘം വിശദമായി പരിശോധിച്ചു വരികയാണ്.
SUMMARY: Bengaluru mass murder: Two more bodies recovered from a forest in Tamil Nadu
