ബെംഗളൂരു: ദീപാവലി ആഘോഷത്തിനിടെ പടക്കം പൊട്ടി ആറുവയസ്സുകാരന് കണ്ണിന് ഗുരുതരമായി പരുക്കേറ്റു. നവംബർ 6-നാണ് സംഭവം. പടക്കം പൊട്ടിക്കുന്നത് കാണുന്നതിനിടെയാണ് കുട്ടിയുടെ വലതുകണ്ണിന് പരുക്കേറ്റത്. പടക്കം പൊട്ടിയതിനെത്തുടർന്ന് കണ്ണിലേക്ക് രാസവസ്തുക്കളും പടക്കത്തിന്റെ അവശിഷ്ടങ്ങളും തെറിച്ചാണ് പരിക്കുണ്ടായതെന്നാണ് പ്രാഥമിക വിവരം. കുട്ടിയെ ഉടൻ ചികിത്സയ്ക്കായി മിന്റോ നേത്രാശുപത്രിയിൽ പ്രവേശിപ്പിച്ചു.
ഈ ദീപാവലി സീസണിൽ മിന്റോ നേത്രാശുപത്രിയിൽ റിപ്പോർട്ട് ചെയ്ത ആദ്യ പടക്കപരിക്കാണിത്. ആഘോഷങ്ങൾക്കിടെ കുട്ടികൾ പടക്കം പൊട്ടിക്കുന്നതും സമീപത്തുനിന്ന് നിരീക്ഷിക്കുന്നതും അപകടസാധ്യത വർധിപ്പിക്കുന്നുവെന്ന് നേത്രചികിത്സാ വിദഗ്ധർ മുന്നറിയിപ്പ് നൽകുന്നു.
പടക്കങ്ങളിൽനിന്നുള്ള തീപ്പൊരി, ചൂടുള്ള അവശിഷ്ടങ്ങൾ, രാസവസ്തുക്കൾ എന്നിവ കണ്ണിന്റെ പുറംപാളിയെയും ആന്തരിക ഭാഗങ്ങളെയും ബാധിക്കാം. ചില പരിക്കുകൾ കാഴ്ചശക്തിക്ക് സ്ഥിരമായ നാശം വരുത്താനും സാധ്യതയുണ്ട്.
പടക്കം പൊട്ടിക്കുന്ന സമയത്ത് കുട്ടികൾ സുരക്ഷിതമായ അകലത്തിൽ നിൽക്കണം. മുതിർന്നവരുടെ നേരിട്ടുള്ള മേൽനോട്ടമില്ലാതെ കുട്ടികളെ പടക്കം കൈകാര്യം ചെയ്യാൻ അനുവദിക്കരുത്. പടക്കം പൊട്ടിയുണ്ടാകുന്ന അവശിഷ്ടങ്ങൾ കണ്ണിൽ പതിച്ചാൽ കണ്ണ് തിരുമ്മുകയോ സ്വയം മരുന്ന് ഒഴിക്കുകയോ ചെയ്യരുത്. ഉടൻ നേത്രചികിത്സ തേടുകയാണ് വേണ്ടത്.
അടിയന്തര ഹെൽപ്പ്‌ലൈനുകൾ:
9481740137 – മിന്റോ ഒഫ്താൽമിക് ആശുപത്രി
9594904060 – ഡോ. അഗർവാൾസ് ഐ ആശുപത്രി
080-66121641 & 9902546046 – നാരായണ നേത്രാലയ
1800 5713 333 – വാസൻ ഐ കെയർ
SUMMARY: Crackers burst during Diwali celebrations; A six-year-old boy suffered a serious eye injury
