ബെംഗളൂരു: ദീപാവലി ആഘോഷത്തിനിടെ പടക്കം പൊട്ടിക്കുന്നതിനിടെയുണ്ടായ അപകടങ്ങളിൽ ബെംഗളൂരുവിൽ 32 പേർക്ക് പരുക്കേറ്റു. പടക്കങ്ങളിൽനിന്നുള്ള തീപ്പൊരി കണ്ണിൽ പതിച്ചതിനെത്തുടർന്ന് നിരവധി പേർ ചികിത്സ തേടിയിട്ടുണ്ട്. പരുക്കേറ്റവരിൽ കുട്ടികളും മുതിർന്നവരും ഉൾപ്പെടുന്നുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്.
പരുക്കേറ്റവരിൽ 20 പേർ നാരായണ ഹെൽത്ത് ആശുപത്രിയിൽ ചികിത്സ തേടിയതായി ആശുപത്രി അധികൃതർ അറിയിച്ചു. കണ്ണിന് പരുക്കേറ്റവർക്കാണ് പ്രധാനമായും ചികിത്സ ആവശ്യമായി വന്നത്. ചിലർക്ക് പൊള്ളലും മറ്റ് പരിക്കുകളും ഉണ്ടായിട്ടുണ്ട്.
പടക്കം പൊട്ടിക്കുന്നതിനിടെ സുരക്ഷാ മുൻകരുതലുകൾ പാലിക്കാത്തതാണ് ഇത്തരം അപകടങ്ങൾക്ക് പ്രധാന കാരണമെന്നാണ് ആരോഗ്യവിദഗ്ധരുടെ വിലയിരുത്തൽ. പടക്കങ്ങൾ കൈകാര്യം ചെയ്യുമ്പോൾ സുരക്ഷിതമായ അകലം പാലിക്കണമെന്നും കുട്ടികളെ മുതിർന്നവരുടെ മേൽനോട്ടമില്ലാതെ പടക്കം പൊട്ടിക്കാൻ അനുവദിക്കരുതെന്നും ഡോക്ടർമാർ നിർദേശിച്ചു.
പടക്കത്തിന്റെ തീപ്പൊരി കണ്ണിൽ പതിച്ചാൽ കണ്ണ് തിരുമ്മുകയോ സ്വയം മരുന്ന് ഉപയോഗിക്കുകയോ ചെയ്യരുത്. ഉടൻ നേത്രരോഗ വിദഗ്ധന്റെ സഹായം തേടണം. ചില കണ്ണുപരിക്കുകൾ തുടക്കത്തിൽ ഗുരുതരമായി തോന്നാതിരുന്നാലും പിന്നീട് കാഴ്ചയെ ബാധിക്കാൻ സാധ്യതയുള്ളതിനാൽ ചികിത്സ വൈകിക്കരുതെന്നും വിദഗ്ധർ മുന്നറിയിപ്പ് നൽകി.
SUMMARY: Accidents during Diwali celebrations; 32 people injured in Bengaluru
