ഭോപ്പാല്‍: രസഗുളയെന്ന് പറഞ്ഞ് അയല്‍വാസി കൊടുത്ത നാടന്‍ ബോംബ് കഴിച്ച യുവാവിന് ദാരുണാന്ത്യം. മധ്യപ്രദേശിലെ ഡിൻഡോരി ജില്ലയിലാണ് സംഭവം. പഡാരിയ ഛാന്ത ഗ്രാമത്തിലെ രാജേന്ദ്ര ബറൗട്ടിയയാണ് (35) കൊല്ലപ്പെട്ടത്. സംഭവത്തിൽ അയൽവാസിയായ രാമഭഗത് ബറൗട്ടിയയെ പോലീസ് കസ്റ്റഡിയിലെടുത്തു. കാട്ടുപന്നികളെ കൊല്ലാന്‍ ഉപയോഗിക്കുന്ന നാടന്‍ ബോംബാണ് യുവാവ് കടിച്ചത്.
ചൊവ്വാഴ്ച രാത്രി എട്ട് മണിയോടെയാണ് സംഭവം. അത്താഴത്തിന് ശേഷം രാജേന്ദ്രയും കുടുംബവും വീടിന്റെ മുറ്റത്ത് തീകാഞ്ഞിരിക്കുമ്പോഴാണ് അയൽവാസിയായ രാമഭഗത് അവിടേക്ക് എത്തിയത്. ഇരുവരും സംസാരിക്കുന്നതിനിടെ രാമഭഗത് തന്റെ കൈവശമുണ്ടായിരുന്ന ഒരു സാധനം രസഗുളയാണെന്ന് പറഞ്ഞ് രാജേന്ദ്രയ്ക്ക് കഴിക്കാൻ നൽകുകയായിരുന്നു. മധുരപലഹാരമാണെന്ന് കരുതി രാജേന്ദ്ര അത് വായിലിട്ട് കടിച്ചതും വലിയ ശബ്ദത്തോടെ പൊട്ടിത്തെറിക്കുകയുമായിരുന്നു.
മൃഗങ്ങളെ വേട്ടയാടാനും കൊല്ലാാനുമായി ഉപയോഗിക്കുന്ന ബോംബാണ് ഇയാള്‍ക്ക് നല്‍കിയതെന്ന് രാജേന്ദ്രയുടെ ഭാര്യ സുശീല ബായി വ്യക്തമാക്കി. സ്ഫോടനം നടന്നയുടന്‍ തന്നെ നാട്ടുകാരുടെ സഹായത്തോടെ അദ്ദേഹത്തെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
പ്രതിക്കെതിരെ ഭാരതീയ ന്യായ സംഹിത സെക്ഷൻ 105, സ്ഫോടകവസ്തു നിയമത്തിലെ 3, 4 വകുപ്പുകൾ എന്നിവ പ്രകാരം പോലീസ് കേസെടുത്തു. തനിക്ക് ഈ ബോംബ് മറ്റൊരു ആണ്‍കുട്ടിയാണ് തന്നതെന്നാണ് രാം ഭഗത് പോലീസിന് നല്‍കിയിരിക്കുന്ന മൊഴി. ഇതിന്റെ അടിസ്ഥാനത്തില്‍ ആണ്‍കുട്ടിയെയും പോലീസ് കസ്റ്റഡിയിലെടുത്ത് വിശദമായി ചോദ്യം ചെയ്തു വരികയാണ്.
SUMMARY: A young man died in an explosion after biting into a country-made bomb that a neighbor had given him, claiming it was a rasgulla.
