തിരുവനന്തപുരം: 2024 ലെ തൃശൂർ പൂരം കലക്കൽ കേസിൽ ക്രൈംബ്രാഞ്ച് നൽകിയ അന്വേഷണ റിപ്പോർട്ട് സംസ്ഥാന സർക്കാർ തള്ളി . എഡിജിപി എം.ആർ. അജിത്കുമാറിന് എതിരെ ദുർബല പരാമർശം മാത്രം ഉൾപ്പെടുത്തിയ റിപ്പോർട്ടാണ് സർക്കാർ തള്ളിയത്. കൂടുതൽ തെളിവുകളും വിശദീകരണങ്ങളും ഉൾപ്പെടുത്തി പുതിയ റിപ്പോർട്ട് സമർപ്പിക്കാൻ ആഭ്യന്തരമന്ത്രി രമേശ് ചെന്നിത്തല സംസ്ഥാന പൊലീസ് മേധാവിക്ക് നിർദേശം നൽകി.
തിരുവമ്പാടി ദേവസ്വത്തിലെ 10 ഭാരവാഹികൾക്കെതിരെ ഗൂഢാലോചന, കലാപ ആഹ്വാനം ഉൾപ്പെടെയുള്ള വകുപ്പുകൾ ചുമത്താനുള്ള അനുമതി തേടിയാണു റിപ്പോർട്ടെങ്കിലും ആരോപണങ്ങൾക്കൊപ്പം വ്യക്തമായ തെളിവുകളില്ലായിരുന്നു. പൂരത്തിന്‍റെ മേൽനോട്ടച്ചുമതലയുണ്ടായിരുന്ന എഡിജിപി എം.ആർ. അജിത്കുമാറിന് ജാഗ്രതക്കുറവുണ്ടായെന്നു റിപ്പോർട്ടിൽ പരാമർശിച്ചെങ്കിലും നടപടി സ്വീകരിക്കാനുള്ള തെളിവുകൾ കണ്ടെത്താൻ എസ്ഐടിക്കു കഴിഞ്ഞില്ല.
എൽഡിഎഫ് സർക്കാരിന്‍റെ കാലത്ത് ഏറെ വിവാദമായ പൂരം കലക്കൽ അന്വേഷണം ഇതോടെ വീണ്ടും പൊലിസിലേക്കു തിരിച്ചെത്തുന്നു. അജിത്കുമാർ സമർപ്പിച്ച റിപ്പോർട്ട് 2024 ൽ ആഭ്യന്തര വകുപ്പ് തള്ളിയിരുന്നു. തുടർന്നാണ്, മുൻ സർക്കാരിന്‍റെ കാലത്ത് ക്രൈംബ്രാഞ്ച് മേധാവി എച്ച്. വെങ്കിടേഷിന്‍റെ നേതൃത്വത്തിൽ പ്രത്യേക അന്വേഷണ സംഘം രൂപീകരിച്ചത്.
പൊലിസിന്‍റെയും ദേവസ്വം ഉദ്യോഗസ്ഥരുടെയും ഭാഗത്തുണ്ടായ 16 വീഴ്ചകളാണ് എസ്ഐടിയുടെ 15 പേജ് റിപ്പോർട്ടിലുള്ളത്. വീഴ്ച വരുത്തിയ മറ്റു പൊലിസുകാർക്കെതിരെ സ്വീകരിക്കേണ്ട നടപടികളെക്കുറിച്ച് റിപ്പോർട്ടിൽ പരാമർശമില്ല. പൊലിസിന്‍റെ നിർദേശങ്ങൾ ദേവസ്വം ജീവനക്കാർ അവഗണിച്ചെന്നും ചൂണ്ടിക്കാട്ടിയിരുന്നു.
പുതിയ റിപ്പോർട്ട് സമർപ്പിക്കാൻ ആഭ്യന്തരമന്ത്രി രമേശ് ചെന്നിത്തല സംസ്ഥാന പൊലിസ് മേധാവിയോട് ആവശ്യപ്പെട്ടു. കൂടുതൽ വിശദീകരണവും തെളിവുകളിൽ വ്യക്തതയും ആവശ്യപ്പെട്ടാണു ചെന്നിത്തല റിപ്പോർട്ട് മടക്കിയത്.
SUMMARY: Thrissur Pooram disruption: Government returns Crime Branch report, citing insufficient evidence
