ബെംഗളൂരു: നഗരത്തിലെ മാലിന്യപ്രശ്നത്തിൽ ലോകായുക്തയുടെ ഇടപെടലിനെത്തുടർന്ന് ഷെട്ടിഹള്ളി വാർഡിൽ ഒറ്റദിവസം നീക്കിയത് ഏകദേശം 80 ടൺ മാലിന്യം. കാമ്മഗൊണ്ടനഹള്ളിയിലും സമീപപ്രദേശങ്ങളിലും മാലിന്യം കുന്നുകൂടിയതിനെക്കുറിച്ച് പ്രദേശവാസികൾ നൽകിയ പരാതികളാണ് നടപടിക്ക് വഴിയൊരുക്കിയത്.
ലോകായുക്ത ജസ്റ്റിസ് ബി.എസ്. പാട്ടീൽ വിഷയത്തിൽ ഇടപെട്ടതിനെത്തുടർന്ന് മാലിന്യനീക്ക പ്രവർത്തനങ്ങൾ ഊർജിതമാക്കി. നിലവിലുണ്ടായിരുന്ന കരാറുകാരനെ ഒഴിവാക്കി പകരം പുതിയ കരാറുകാരനെ ചുമതലപ്പെടുത്തി. മാലിന്യം നീക്കം ചെയ്യുന്നതിനായി രണ്ട് കോംപാക്ടർ വാഹനങ്ങൾ, നാല് ടിപ്പറുകൾ, ഒരു ജെ.സി.ബി. എന്നിവയാണ് വിന്യസിച്ചത്.
പ്രദേശത്ത് ദീർഘകാലമായി മാലിന്യം അടിഞ്ഞുകൂടിയിരുന്നതായി നാട്ടുകാർ പരാതിപ്പെട്ടിരുന്നു. ശുചീകരണ നടപടിയോടെ കാമ്മഗൊണ്ടനഹള്ളിയിലെയും സമീപപ്രദേശങ്ങളിലെയും താമസക്കാർക്ക് ആശ്വാസമായി. എന്നാൽ മാലിന്യം നീക്കുന്നതോടൊപ്പം ദിവസേനയുള്ള ശേഖരണവും സംസ്കരണവും കാര്യക്ഷമമാക്കേണ്ടതുണ്ടെന്ന ആവശ്യവും ഉയരുന്നുണ്ട്.
മാലിന്യനീക്കവുമായി ബന്ധപ്പെട്ട പരാതികൾ കർണാടക ലോകായുക്ത ഓഫീസിൽ നേരിട്ട് അറിയിക്കാമെന്ന് അധികൃതർ വ്യക്തമാക്കിയിട്ടുണ്ട്. ഇതിനായി 94484 77772 എന്ന ഫോൺ നമ്പറിലും അറിയിക്കാവുന്നതാണ്.
SUMMARY: Lokayukta intervenes in waste issue; 80 tonnes of waste cleared in Bengaluru in a single day.
