വാഷിങ്ടൺ: ആർട്ടിഫിഷ്യൽ ഇന്റലിജൻസ് അഥവാ നിർമിതബുദ്ധിയുടെ അതിവേഗത്തിലുള്ള വളർച്ച ആഗോള ടെക് മേഖലയിലെ തൊഴിൽ രീതികളിൽ വലിയ മാറ്റങ്ങൾ സൃഷ്ടിക്കുന്നതിനിടെ, ഏകദേശം 60,000 ജീവനക്കാർക്ക് സ്വമേധയാ വിരമിക്കൽ പാക്കേജ് (Voluntary Exit Program) വാഗ്ദാനം ചെയ്ത് മൈക്രോസോഫ്റ്റ്. എ.ഐ സാങ്കേതികവിദ്യയ്ക്ക് അനുസൃതമായി കമ്പനിയുടെ പ്രവർത്തനങ്ങളെ പുനഃക്രമീകരിക്കുന്നതിന്റെയും ജീവനക്കാർക്ക് കരിയറിൽ കൂടുതൽ സ്വയംനിർണയാവകാശം നൽകുന്നതിന്റെയും ഭാഗമായാണ് ഈ സുപ്രധാന നീക്കമെന്ന് മൈക്രോസോഫ്റ്റ് സി.ഇ.ഒ സത്യ നാദെല്ല വ്യക്തമാക്കി. ആഗോളതലത്തിലുള്ള വിവിധ വിഭാഗങ്ങളിലായി ഏകദേശം 60,000 ജീവനക്കാർക്കാണ് ഈ പദ്ധതി പ്രയോജനപ്പെടുത്താൻ സാധിക്കുക.
നിർമിതബുദ്ധിയുടെ കടന്നുവരവ് മൈക്രോസോഫ്റ്റിലെ ടീമുകളുടെ പ്രവർത്തനരീതിയെ അടിമുടി മാറ്റിക്കൊണ്ടിരിക്കുകയാണെന്ന് സത്യ നാദെല്ല ജീവനക്കാരുമായുള്ള ആശയവിനിമയത്തിൽ വിശദീകരിച്ചു. വരും വർഷങ്ങളിൽ കമ്പനിയിൽ പുതിയ തൊഴിലവസരങ്ങൾ സൃഷ്ടിക്കപ്പെടുമെങ്കിലും, ജോലിയുടെ സ്വഭാവം പഴയതുപോലെയായിരിക്കില്ലെന്ന് അദ്ദേഹം ചൂണ്ടിക്കാട്ടി. നിലവിലെ ജോലിയിൽ വളർച്ചയില്ലെന്നോ പുതിയ സാങ്കേതിക മാറ്റങ്ങളുമായി പൊരുത്തപ്പെടാൻ പ്രയാസമുണ്ടെന്നോ തോന്നുന്ന ജീവനക്കാർക്ക് മികച്ച സാമ്പത്തിക ആനുകൂല്യങ്ങളോടെ മറ്റ് മേഖലകളിലേക്ക് മാറാൻ സ്വാതന്ത്ര്യമുണ്ടാകണം. അതേസമയം, പിരിഞ്ഞുപോകാൻ താല്പര്യമില്ലാത്തവർക്ക് മൈക്രോസോഫ്റ്റിനുള്ളിലെ തന്നെ പുതിയ എ.ഐ, ക്ലൗഡ് വിഭാഗങ്ങളിലേക്ക് മാറുന്നതിനുള്ള നൈപുണ്യ പരിശീലനവും അവസരവും ലഭിക്കുമെന്നും മാറ്റങ്ങളെക്കുറിച്ച് പൂർണ്ണമായും സുതാര്യമായ നിലപാടാണ് കമ്പനി സ്വീകരിക്കുന്നതെന്നും നാദെല്ല വ്യക്തമാക്കി.
നേരത്തെ സോഫ്റ്റ്വെയർ എൻജിനീയർമാരുടെ ജോലിയുടെ സിംഹഭാഗവും കോഡിങ്, പ്രോഗ്രാമിങ് എന്നിവയായിരുന്നു. എന്നാൽ ഗിറ്റ്ഹബ് കോപൈലറ്റ് പോലുള്ള എ.ഐ ഉപകരണങ്ങൾ കോഡിങ് പ്രക്രിയയുടെ വലിയൊരു ഭാഗം ഏറ്റെടുത്തതോടെ പരമ്പരാഗത ജോലികളുടെ പ്രസക്തി കുറഞ്ഞുവരികയാണ്. നിലവിൽ ഉപഭോക്താക്കളുമായി നേരിട്ട് സഹകരിച്ച് എ.ഐ സാങ്കേതികവിദ്യ നടപ്പിലാക്കാൻ സഹായിക്കുന്ന ഫോർവേഡ് ഡിപ്ലോയ്ഡ് എൻജിനീയർമാർ പോലുള്ള റോളുകൾക്കാണ് വലിയ പ്രാധാന്യമുള്ളത്. വർഷങ്ങളുടെ പ്രവൃത്തിപരിചയമുള്ള എൻജിനീയർമാർ പോലും തങ്ങളുടെ അറിവ് എ.ഐ ടൂളുകളുമായി സംയോജിപ്പിച്ച് പ്രവർത്തിക്കാൻ പഠിക്കേണ്ടതുണ്ടെന്നും, പുതിയ കാര്യങ്ങൾ പഠിക്കാൻ തയ്യാറുള്ളവർക്ക് കമ്പനിയിൽ മികച്ച ഭാവിയുണ്ടാകുമെന്നും അദ്ദേഹം കൂട്ടിച്ചേർത്തു.
മൈക്രോസോഫ്റ്റിൽ മാത്രമല്ല, ആഗോളതലത്തിലെ മറ്റ് മുൻനിര ടെക് കമ്പനികളിലും സമാനമായ തൊഴിൽ പുനഃക്രമീകരണം നടക്കുന്നുണ്ട്. എ.ഐ അടിസ്ഥാന സൗകര്യങ്ങൾക്കായി കോടിക്കണക്കിന് ഡോളർ നിക്ഷേപിക്കുമ്പോൾ, മറ്റ് വിഭാഗങ്ങളിലെ പ്രവർത്തനച്ചെലവ് കുറയ്ക്കാനാണ് കമ്പനികൾ ശ്രമിക്കുന്നത്. ഗൂഗിൾ, മെറ്റ, ആമസോൺ തുടങ്ങിയ കമ്പനികളും വിവിധ രാജ്യങ്ങളിൽ സമാനമായ വോളന്ററി എക്സിറ്റ് പദ്ധതികളും തസ്തിക വെട്ടിക്കുറയ്ക്കലുകളും നടപ്പിലാക്കിയിട്ടുണ്ട്. പരമ്പരാഗത ഐ.ടി സേവനങ്ങളിൽ നിന്ന് ശ്രദ്ധ മാറ്റി, ആർട്ടിഫിഷ്യൽ ഇന്റലിജൻസ്, ക്ലൗഡ് കമ്പ്യൂട്ടിങ് എന്നീ മുൻഗണനാ മേഖലകളിലേക്ക് മനുഷ്യവിഭവശേഷിയും മൂലധനവും കേന്ദ്രീകരിക്കുകയാണ് ആഗോള ടെക് ഭീമന്മാരുടെ നിലവിലെ തന്ത്രം.
SUMMARY: Microsoft to offer ‘voluntary exit’ to 60,000 people
















