തിരുവനന്തപുരം: ശബരിമല അവലോകന യോഗത്തില് നിന്ന് എഡിജിപി എം ആര് അജിത് കുമാറിനെ പങ്കെടുപ്പിച്ചില്ല. മുഖ്യമന്ത്രി പിണറായി വിജയന്റെ നേതൃത്വത്തില് നടന്ന യോഗത്തില് നിന്നാണ് അജിത് കുമാറിനെ മാറ്റിയത്. ഡിജിപിയും ഇന്റലിജന്സ്, ഹെഡ് ക്വാര്ട്ടേഴ്സ് എഡിജിപിമാരുമാണ് യോഗത്തില് പങ്കെടുത്തത്. ക്രമസമാധാന ചുമതലയുള്ള എഡിജിപി അജിത് കുമാറാണ് യോഗത്തില് പങ്കെടുക്കേണ്ടിയിരുന്നത്. നിരവധി ആരോപണങ്ങള് നേരിടുന്ന അജിത് കുമാറിനെ ക്രമസമാധാന ചുമതലയില് നിന്നും മാറ്റിയേക്കുമെന്ന റിപ്പോര്ട്ടുകള്ക്കിടെയാണ് യോഗത്തില് നിന്നും ഇദ്ദേഹത്തെ മാറ്റി നിര്ത്തിയിരിക്കുന്നതെന്നത് ശ്രദ്ധേയമാണ്.
അജിത് കുമാറിന്റെ ശബരിമലയിലെ ഇടപെടലില് വിമര്ശനങ്ങള് ഉയരുകയും അജിത് കുമാറിനെതിരെ ഇന്റലിജന്സ് റിപ്പോര്ട്ട് പുറത്തുവരികയും ചെയ്ത സാഹചര്യത്തിലാണിത്. ക്രമസമാധാന ചുമതലയുള്ള എഡിജിപി എന്ന സ്ഥാനത്തുനിന്ന് അജിത് കുമാറിനെ മാറ്റണമെന്ന് സിപിഐ ഉള്പ്പെടെ ആവര്ത്തിച്ച് ആവശ്യപ്പെട്ടുവരികയാണ്. മുഖ്യമന്ത്രിയുടെ ഓഫിസ് ഇടപെട്ടാണ് അജിത് കുമാറിനെ ഒഴിവാക്കിയതെന്നാണ് വിവരം. ഇന്ന് അല്ലെങ്കിൽ നാളെ അജിത് കുമാറിനെതിരായ റിപ്പോർട്ട് ഡിജിപി സമർപ്പിക്കുമെന്നാണ് വിവരം. ഇതിനു മുന്നോടിയായാണു മാറ്റിനിർത്തൽ എന്നാണു റിപ്പോര്ട്ടുകള്.
അതേസമയം ഇന്നത്തെ യോഗത്തില് ശബരിമലയില് ഇത്തവണ ഓണ്ലൈന് ബുക്കിങ്ങ് മാത്രം അനുവദിക്കാന് തീരുമാനിച്ചു. ഒരു ദിവസം പരമാവധി 80,000 പേര്ക്ക് ദര്ശന സൗകര്യം ഒരുക്കും. വെര്ച്ച്വല് ക്യൂ ബുക്കിങ്ങ് സമയത്ത് തന്നെ യാത്രാ വഴി തെരഞ്ഞെടുക്കാനുള്ള അവസരം ഒരുക്കും.അതുവഴി തീര്ത്ഥാടകര്ക്ക് തിരക്ക് കുറഞ്ഞ യാത്രാ വഴി തിരഞ്ഞെടുക്കാനാവും.
<br>
TAGS : ADGP M R AJITH KUMAR | SABARIMALA
SUMMARY : ADGP MR Ajith Kumar excluded from Sabarimala review meeting
