ബെംഗളൂരു: വൈറ്റ്ഫീൽഡ് ഡെപ്പോയിൽ പുതിയ മെട്രോ ട്രാക്ക് നിർമ്മിക്കാനൊരുങ്ങി ബിഎംആർസിഎൽ. പർപ്പിൾ ലൈനിലെ തിരക്ക് കുറയ്ക്കുന്നതിന്റെ ഭാഗമായാണ് നടപടി. നിലവിൽ പർപ്പിൾ ലൈനിലെ അവസാന സ്റ്റേഷൻ ആയ കാടുഗോഡി (വൈറ്റ്ഫീൽഡ്) സ്റ്റേഷനിൽ പുതിയ ട്രാക്ക് നിർമാണ പ്രവൃത്തികൾ ആരംഭിച്ചതായി ബിഎംആർസിഎൽ അറിയിച്ചു. ഇതുവഴി ട്രെയിനുകളുടെ മടക്ക സർവീസ് വേഗത്തിലാക്കുവാനും ട്രെയിനുകൾ തമ്മിലുള്ള ഇടവേള കുറയ്ക്കുകയുമാണ് ലക്ഷ്യം.
വൈറ്റ്ഫീൽഡിൽ ആളുകളെ ഇറക്കിയ ശേഷം ട്രെയിനുകൾ വൈറ്റ്ഫീൽഡ് ഡിപ്പോയിലേക്ക് പോകുന്നതാണ് പതിവ് രീതി. ഇതിന് അധിക സമയം ട്രെയിനുകൾക്ക് ആവശ്യമാണ്. വയഡക്റ്റിൽ നിലവിൽ പുതിയ സൈഡ് ട്രാക്ക് വന്നാൽ ട്രെയിനുകൾക്ക് ഡിപ്പോയിലേക്കും, തിരിച്ചു സ്റ്റേഷനിലേക്കുമുള്ള യാത്ര എളുപ്പമാകും. പർപ്പിൾ ലൈനിൽ യാത്രക്കാരുടെ തിരക്ക് വർധിച്ചിട്ടും ട്രെയിനുകളുടെ എണ്ണം വർധിപ്പിക്കാത്തതിൽ നമ്മ മെട്രോക്ക് കടുത്ത വിമർശനം നേരിടേണ്ടി വന്നിരുന്നു. 43.49 കിലോമീറ്റർ ദൈർഘ്യത്തിൽ 37 സ്റ്റേഷനുകളാണ് ലൈനിലുള്ളത്. നിലവിൽ രാവിലെയും വൈകിട്ടും ഉൾപ്പെടെ തിരക്കേറിയ സമയങ്ങളിൽ 5 മിനിറ്റും, മറ്റ് സമയങ്ങളിൽ 8 മിനിറ്റും ഇടവേളകളിലാണ് ട്രെയിൻ സർവീസ് നടത്തുന്നത്.
TAGS: BENGALURU | NAMMA METRO
SUMMARY: New track to come up at purple line whitefield depot
