ബെംഗളൂരു: ബെംഗളൂരു വേനൽച്ചൂടിലേക്ക്. കഴിഞ്ഞ ദിവസങ്ങളിൽ നഗരത്തിൽ കനത്ത ചൂടാണ് അനുഭവപ്പെട്ടത്. നഗരത്തിൽ ഈ സീസണിലെ ഏറ്റവുമധികം താപനില റിപ്പോർട്ട്‌ ചെയ്തത് ഫെബ്രുവരി 12നാണ്. താപനില അപ്രതീക്ഷിതമായ 33.6 ഡിഗ്രി സെൽഷ്യസിലേക്ക് ഉയർന്നെന്ന് കാലാവസ്ഥ നിരീക്ഷണ കേന്ദ്രം (ഐഎംഡി) അറിയിച്ചു. പതിവിന് വിപരീതമായി ഈ വർഷം വേനൽ നഗരത്തിൽ നേരത്തെ എത്തുമെന്നാണ് നിലവിലെ കാലാവസ്ഥാ മാറ്റങ്ങൾ സൂചിപ്പിക്കുന്നത്. വരും ദിവസങ്ങളിൽ താപനില ഉയർന്നേക്കുമെന്ന് ഐഎംഡി വൃത്തങ്ങൾ പറഞ്ഞു.
ബെംഗളൂരുവിൽ നിലവിലെ താപനില സാധാരണയേക്കാൾ 3 ഡിഗ്രി സെൽഷ്യസ് കൂടുതലാണ് രേഖപ്പെടുത്തുന്നത്. വേനൽക്കാലത്ത് താപനിലയായി കണക്കാക്കുന്നത് 34 ഡിഗ്രി സെൽഷ്യസ് ആണ്. ഇത് ഏപ്രിൽ മാസത്തോടെയാണ് റിപ്പോർട്ട്‌ ചെയ്യാറുള്ളത്. എന്നാല്‍ നഗരത്തിൽ ഇപ്പോൾ തന്നെ 33.6 ഡിഗ്രി സെൽഷ്യസ് രേഖപ്പെടുത്തി കഴിഞ്ഞു. തണുപ്പുകാലം നേരത്തെ അവസാനിച്ച് നഗരം വേനലിലേക്ക് കടക്കുന്നതിന്‍റെ സൂചനയാണിതെന്ന് ഐഎംഡി ഉദ്യോഗസ്ഥർ പറഞ്ഞു. രാത്രിയും പകലും തമ്മിൽ താപനിലയില്‍ ഇപ്പോൾ 17.6 ഡിഗ്രി സെൽഷ്യസ് വ്യത്യാസം അനുഭവപ്പെടുന്നുമുണ്ട്. ഇത് ആരോഗ്യ പ്രശ്നങ്ങൾക്ക് കാരണമായേക്കുമെന്ന് ആരോഗ്യ വകുപ്പ് ഉദ്യോഗസ്ഥർ പറഞ്ഞു.
TAGS: BENGALURU | CLIMATE
SUMMARY: Bengaluru gets more hottest this year before april
