കാസറഗോഡ്: കണ്ണൂര്‍ സര്‍വകലാശാലാ പരീക്ഷയുടെ ചോദ്യപേപ്പര്‍ ചോര്‍ന്ന സംഭവത്തില്‍ കാസറഗോട്ടെ കോളജ് പ്രിൻസിപ്പലിനെതിരെ നടപടി. പാലക്കുന്നിലെ ഗ്രീൻവുഡ്സ് ആർട്സ് ആൻഡ് സയൻസ് കോളജ് പ്രിൻസിപ്പല്‍ ഇൻചാർജ് പി. അജീഷിനെയാണ്സ സ്പെൻഡ് ചെയ്തു. ബേക്കല്‍ പോലീസ് കേസടുത്തതിന് പിന്നാലെയാണ് കോളജിന്റെ നടപടി. ഇ- മെയിലിലൂടെ അയച്ച ചോദ്യപേപ്പര്‍ രഹസ്യ സ്വഭാവം സൂക്ഷിക്കാതെ പരസ്യപ്പെടുത്തിയെന്നാണ് കേസ്.
കണ്ണൂർ സർവകലാശാല രജിസ്ട്രാർ നല്‍കിയ പരാതിയില്‍ ജാമ്യമില്ലാ വകുപ്പുകള്‍ പ്രകാരമായിരുന്നു പ്രിൻസിപ്പലിനെതിരെ കേസെടുത്തത്. പ്രിൻസിപ്പല്‍ സർവകലാശാലയെ വഞ്ചിച്ചെന്നും എഫ് ഐ ആറിലുണ്ട്. ചോദ്യപേപ്പര്‍ ചോര്‍ച്ച വിവാദമായതോടെ എല്ലാ പരീക്ഷാ സെന്‍ററുകളിലും നിരീക്ഷകരെ നിയോഗിക്കാന്‍ യൂണിവേഴ്സിറ്റി തീരുമാനിച്ചിട്ടുണ്ട്.
നാളെ മുതല്‍ ഓരോ നിരീക്ഷരെ നിയോഗിക്കും. 60 പേരെ ഇതിനായി ചുമതലപ്പെടുത്തി. ഇ മെയിലില്‍ നിന്ന് ചോദ്യപേപ്പര്‍ ഡൗണ്‍ലോ‍ഡ് ചെയ്യുമ്പോൾ ഇവരുടെ സാന്നിധ്യം ഉറപ്പാക്കും. കാസറഗോഡ് പാലക്കുന്ന് ഗ്രീന്‍ വുഡ് കോളജിലെ വിദ്യാര്‍ഥികള്‍ക്ക് മാത്രം ബി സി എ ആറാം സെമസ്റ്റര്‍ പരീക്ഷ വീണ്ടും നടത്താനും യൂനിവേഴ്സിറ്റി തീരുമാനിച്ചു.
TAGS : KANNUR UNIVERSITY
SUMMARY : Kannur University question paper leak: College principal suspended
