പെഷാവർ: വടക്കുപടിഞ്ഞാറൻ പാകിസ്ഥാനിലുണ്ടായ ചാവേറാക്രമണത്തിൽ 12 പേർ കൊല്ലപ്പെട്ടു. മുപ്പതോളം പേർക്ക് പരുക്കേറ്റു. ദേരാ ഇസ്മയിൽ ഖാനിലെ ചെക്പോയിന്റിനു സമീപം റോഡരികിൽ നിർത്തിയിട്ടിരുന്ന, സ്ഫോടക വസ്തുക്കൾ നിറച്ച വാഹനം പൊട്ടിത്തെറിക്കുകയായിരുന്നു. പരുക്കേറ്റവരിൽ പലരുടെയും നില ഗുരുതരമാണെന്ന് പാക്ക് മാധ്യമങ്ങൾ റിപ്പോർട്ട് ചെയ്തു. നിരോധിത ഭീകര സംഘടനയായ തെഹ്‌രീക്-ഇ-താലിബാൻ നടത്തിയ ആക്രമണത്തില്‍ രണ്ട് സ്ത്രീകളും രണ്ട് കുട്ടികളും ഉള്‍പ്പെടുന്നു.
സ്ഫോടക വസ്തുക്കൾ നിറച്ച ട്രാക്ടർ തെഹ്സിലിലെ അമൻ മേല പൊലീസ് ചെക്പോസ്റ്റിലേക്ക് ഇടിച്ചുകയറ്റുകയായിരുന്നുവെന്ന് റീജിയണൽ പോലീസ് ഓഫീസർ ഖാൻ മുബാഷിർ മാലിക് പറഞ്ഞു. കൊല്ലപ്പെട്ടവരിൽ കസ്റ്റംസ്, എക്സൈസ് ഉദ്യോഗസ്ഥരുമുണ്ടെന്ന് പോലീസ് വ്യക്തമാക്കി.പരിക്കേറ്റവരെ ചികിത്സയ്ക്കായി ജില്ലാ ആസ്ഥാന ആശുപത്രിയിലേക്ക് മാറ്റി. മൃതദേഹങ്ങളും ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. ബോംബ് സ്ക്വാഡ് സ്ഥലത്ത് പരിശോധന തുടരുകയാണെന്ന് പോലീസ് അറിയിച്ചു.
ആക്രമണത്തെത്തുടർന്ന് സുരക്ഷാ സേന പ്രദേശം വളയുകയും തിരച്ചിൽ ആരംഭിക്കുകയും ചെയ്തു. പ്രദേശത്ത് കനത്ത ജാഗ്രത നിർദേശം നൽകി.
ഖൈബർ പഖ്തൂൺഖ്വയിലെ തന്നെ കോഹട്ടിലെ പള്ളിക്കുനേരെ ചാവേറാക്രമണമുണ്ടായി 21 പേർ കൊല്ലപ്പെട്ട സംഭവത്തിന് ദിവസങ്ങൾക്കകമാണ് പുതിയ ആക്രമണം. അന്നത്തെ ആക്രമണത്തിൽ കൊല്ലപ്പെട്ടവരിൽ 15 പോലീസ് ഉദ്യോഗസ്ഥരും ഉൾപ്പെടുന്നു. 78 പേർക്കാണ് പരുക്കേറ്റത്. അഫ്ഗാനിസ്ഥാനുമായി അതിർത്തി പങ്കിടുന്ന പ്രവിശ്യയായ ഖൈബർ പഖ്തൂൺഖ്വയിൽ സമാന ആക്രമണങ്ങൾ വർധിക്കുകയാണ്.
SUMMARY: A suicide attack on a police checkpoint in Pakistan; 12 people including women and children were killed
