ബെംഗളൂരു: പിതാവിൽ നിന്ന് 90 ലക്ഷം മോചനദ്രവ്യം ആവശ്യപ്പെടുന്നതിനായി സ്വന്തമായി തട്ടിക്കൊണ്ടുപോകൽ നാടകം ആസൂത്രണം ചെയ്ത യുവാവ് ഉൾപ്പെടെ മൂന്ന് പേരെ പോലീസ് പിടികൂടി. ബെംഗളൂരു ബന്നെർഘട്ട റോഡ് മേഖലയിലാണ് സംഭവം. മനോഹർ പട്ടേലിന്റെ മകന്‍ മനീഷ് പട്ടേലും സുഹൃത്തുക്കളായ സുനിൽ, നാഗരാജ് എന്നിവരുമാണ് പിടിയിലായത്. മനേഷിന് ഏകദേശം 1.5 കോടി രൂപ കടബാധ്യത ഉണ്ടായിരുന്നുവെന്നും ഇത് പരിഹരിക്കുന്നതിനായി പിതാവിൽ നിന്ന് പണം നേടുകയായിരുന്നു ലക്ഷ്യമെന്നും പോലീസ് പറഞ്ഞു.
മനോഹർ പട്ടേലിന് മകനെ തട്ടിക്കൊണ്ടുപോയതായി അറിയിച്ചുകൊണ്ട് ഫോണ്‍ സന്ദേശം ലഭിക്കുകയും മോചനദ്രവ്യമായി 90 ലക്ഷം ആവശ്യപ്പെടുകയും ചെയ്തതോടെയാണ് സംഭവങ്ങളുടെ തുടക്കം. ഫോണ്‍ സന്ദേശത്തില്‍ സംശയം തോന്നിയതിനെ തുടർന്ന് പിതാവ് പോലീസിൽ പരാതി നൽകി. മനീഷുമായി ബന്ധപ്പെട്ടവരെയും അദ്ദേഹത്തിന്റെ സുഹൃത്തുക്കളെയും കേന്ദ്രീകരിച്ച് നടത്തിയ അന്വേഷണത്തിലാണ് തട്ടിക്കൊണ്ടുപോകൽ നാടകം ആണെന്ന് പോലീസിന് വ്യക്തമായത്. തുടര്‍ന്നു മനീഷിനെയും രണ്ട് സുഹൃത്തുക്കളേയും പോലീസ് പിടികൂടി ചോദ്യം ചെയ്തു.
കടബാധ്യത തീർക്കാൻ പിതാവിൽ നിന്ന് വലിയ തുക കൈക്കലാക്കുകയായിരുന്നു പദ്ധതിയെന്നാണ് അന്വേഷണത്തിൽ ലഭിച്ച വിവരം. സംഭവത്തിൽ മറ്റാർക്കെങ്കിലും പങ്കുണ്ടോയെന്നും പണം ആവശ്യപ്പെട്ടതിന് പിന്നിലെ മുഴുവൻ ഇടപാടുകളും എന്താണെന്നും പോലീസ് പരിശോധിച്ചുവരികയാണ്.
SUMMARY: Attempt to extort ₹90 lakh ransom from father by staging a kidnapping drama; young man and two friends arrested.
