ബെംഗളൂരു: നഗരത്തിൻ്റെ വിവിധ ഭാഗങ്ങളിൽ നിന്നായി ഇരുചക്ര വാഹനങ്ങൾ മോഷ്ടിച്ച സംഘത്തെ ബെംഗളൂരു സിറ്റി പോലീസ് പിടികൂടി. മൂന്ന് പേരെ അറസ്റ്റ് ചെയ്ത പോലീസ് ഇവരിൽ നിന്ന് 5.5 ലക്ഷം രൂപ വിലമതിക്കുന്ന 10 ഇരുചക്ര വാഹനങ്ങൾ കണ്ടെടുക്കുകയും ചെയ്തു.
മുഹമ്മദ് റാക്കിബ് (26), റഫീഖ് ബാഷ (39), മുഹമ്മദ് അസ്ഗർ (24) എന്നിവരാണ് അറസ്റ്റിലായതെന്ന് പോലീസ് അറിയിച്ചു.2025 ജൂണിൽ ലിംഗരാജപുരം സ്വദേശി നൽകിയ പരാതിയുടെ അടിസ്ഥാനത്തിൽ പോലീസ് നടത്തിയ അന്വേഷണമാണ് പ്രതികളിലേക്ക് എത്തിയത്. അപ്പാജപ്പ ലേഔട്ടിൽ നിന്നാണ് പ്രതികളെ പോലീസ് സംഘം പിടികൂടിയത്. ഇവരെ ചോദ്യം ചെയ്തതോടെ നഗരത്തിലെ വിവിധയിടങ്ങളിൽ നടന്ന ഏഴ് മോഷണക്കേസുകൾക്ക് തുമ്പുണ്ടായി.
ബാനസവാടി, ഡി.ജെ. ഹള്ളി, ഗോവിന്ദപുര, രാജരാജേശ്വരി നഗർ, ഉപ്പാർപേട്ട്, നെലമംഗല എന്നിവിടങ്ങളിൽ നിന്നാണ് പ്രതികൾ വാഹനങ്ങൾ മോഷ്ടിച്ചതെന്ന് പോലീസ് കണ്ടെത്തി. പിടികൂടിയ 10 വാഹനങ്ങളും പോലീസ് കസ്റ്റഡിയിലെടുത്തു. നഗരത്തിൽ വാഹന മോഷണം വർധിക്കുന്ന സാഹചര്യത്തിൽ പോലീസ് നിരീക്ഷണം ശക്തമാക്കിയിട്ടുണ്ട്.
SUMMARY: Bengaluru police arrested three men and recovered 10 stolen bikes worth ₹5.5 lakh.
WhatsApp
Telegram
