തിരുവനന്തപുരം: തിരഞ്ഞെടുപ്പ് കമ്മീഷന്റെ ഔദ്യോഗിക രേഖയില്‍ ബിജെപിയുടെ സീല്‍ പ്രത്യക്ഷപ്പെട്ട സംഭവത്തില്‍ കൂടുതല്‍ നടപടിയുമായി മുഖ്യ തിരഞ്ഞെടുപ്പ് ഓഫീസർ. വീഴ്ച കണ്ടെത്തിയതിനെത്തുടർന്ന് ഡെപ്യൂട്ടി സി.ഇ.ഒ, സെക്ഷൻ ഓഫീസർ എന്നിവരെ തിരഞ്ഞെടുപ്പ് ചുമതലകളില്‍ നിന്ന് അടിയന്തരമായി നീക്കം ചെയ്തു. ഇവരെ മാതൃ വകുപ്പുകളിലേക്ക് തിരിച്ചയക്കാനാണ് മുഖ്യ തിരഞ്ഞെടുപ്പ് ഓഫീസർ ഡോ. രത്തൻ യു. ഖേല്‍ക്കർ ഉത്തരവിട്ടത്.
അഡീഷണല്‍ സി.ഇ.ഒ പി.ബി. നൂഹ് ഐ.എ.എസ് നടത്തിയ 48 മണിക്കൂർ നേരത്തെ ദ്രുതഗതിയിലുള്ള അന്വേഷണ റിപ്പോർട്ടിന്റെ അടിസ്ഥാനത്തിലാണ് പുതിയ നടപടി. നേരത്തെ, ഇമെയില്‍ അയച്ച അസിസ്റ്റന്റ് സെക്ഷൻ ഓഫീസറെ സസ്പെൻഡ് ചെയ്തിരുന്നു. 2019-ലെ തിരഞ്ഞെടുപ്പ് ചട്ടങ്ങള്‍ വിശദീകരിച്ച്‌ ഈ മാസം 22-ന് അയച്ച ഇമെയിലിലാണ് തിരഞ്ഞെടുപ്പ് കമ്മീഷന്റെ സീലിന് പകരം ബിജെപി കേരള ഘടകത്തിന്റെ സീല്‍ പ്രത്യക്ഷപ്പെട്ടത്.
എഐസിസി ജനറല്‍ സെക്രട്ടറി കെ.സി. വേണുഗോപാല്‍ ഉള്‍പ്പെടെയുള്ള പ്രമുഖ നേതാക്കള്‍ക്ക് ഈ കത്ത് ലഭിച്ചിരുന്നു. ഇതൊരു സാങ്കേതിക പിഴവാണെന്നും കത്തിലെ സീല്‍ ശ്രദ്ധയില്‍പ്പെട്ടിരുന്നില്ലെന്നുമാണ് കമ്മീഷന്റെ പ്രാഥമിക വിശദീകരണം. പിശക് ശ്രദ്ധയില്‍പ്പെട്ട ഉടൻ തന്നെ തിരുത്തിയതായും കമ്മീഷൻ അറിയിച്ചു.
SUMMARY: BJP seal on Election Commission’s official email: Two more officials transferred
