ബെംഗളൂരു: മംഗളൂരു പാണ്ഡേശ്വരത്തുള്ള സ്വകാര്യ കോളജില്‍ മലയാളി വിദ്യാര്‍ഥിക്ക് നേരെ വിദ്യാര്‍ഥികളുടെ ക്രൂരമായ റാഗിങ്. തൃശൂര്‍ ചാവക്കാട് സ്വദേശിയും പാണ്ഡേശ്വര്‍ ശ്രീനിവാസ് കോളജിലെ ഒന്നാംവര്‍ഷ ബിബിഎ വിദ്യാര്‍ഥിയുമായ അമീര്‍ അലിക്കും സഹപാഠിക്കുമാണ് സീനിയര്‍ വിദ്യാര്‍ഥികളില്‍ നിന്ന് ക്രൂരമായ ശാരീരിക മാനസിക പീഡനങ്ങള്‍ നേരിടേണ്ടി വന്നത്.
അമീര്‍ അലിയുടെ പരാതിയില്‍ ഒമ്പത് മുതിര്‍ന്ന വിദ്യാര്‍ഥികള്‍ക്കെതിരെ വധശ്രമം, തട്ടിക്കൊണ്ടുപോകല്‍, റാഗിംഗ് വിരുദ്ധ നിയമലംഘനം തുടങ്ങിയ ഗുരുതര വകുപ്പുകള്‍ ചുമത്തി മംഗളൂരു സൗത്ത് (പാണ്ഡേശ്വര്‍) പോലീസ് കേസ് രജിസ്റ്റര്‍ ചെയ്തു. പ്രതികളായ 5 വിദ്യാര്‍ഥികളെ പോലീസ് കസ്റ്റഡിയിലെടുത്തു. 4 വിദ്യാര്‍ഥികള്‍ ഒളിവിലാണ്. കേസിലുള്‍പ്പെട്ട എല്ലാവരും മലയാളികളാണ്.
പയ്യന്നൂര്‍ എട്ടിക്കുളം എംപി ഹൗസില്‍ എം.പി.റെഹാന്‍ (19), കാസറഗോഡ് തൃക്കരിപ്പൂരിലെ മുഹമ്മദ് ഉവൈസ് (19), കോഴിക്കോട് ആക്കല്‍ വട്ടപ്പൊയില്‍ വീട്ടില്‍ മുഹമ്മദ് ആദില്‍ (19), പയ്യന്നൂര്‍ സ്വദേശി രോഹന്‍ രനൂഷ് (19), കണ്ണൂര്‍ സ്വദേശി നഷീദ് അമീര്‍ (19) എന്നിവരെയാണ് പോലീസ് കസ്റ്റഡിയിലെടുത്തത്. അര്‍ഷക്, അനീഷ്, വി.പി.ആദില്‍, ഷിനാസ് എന്നിവരാണ് ഒളിവിലുള്ളത്. എല്ലാവരും ബിബിഎ ലോജിസ്റ്റിക്‌സ് രണ്ടാംവര്‍ഷ വിദ്യാര്‍ഥികളാണ്.
സെപ്റ്റംബര്‍ 19 ന് ഉച്ചയ്ക്ക് കോളേജിന് പുറത്തുകൂടി നടന്നുപോകുകയായിരുന്ന അമീര്‍ അലിയേയും സഹപാഠിയെയും മുതിര്‍ന്ന വിദ്യാര്‍ഥികള്‍ തടഞ്ഞുനിര്‍ത്തുകയായിരുന്നു. തുടര്‍ന്ന് ഇവരെ ബലമായി ബൈക്കില്‍ കയറ്റി കൊണ്ടുപോയി ഒരു മുറിയില്‍ തടങ്കലില്‍ വച്ചു. ചോദ്യം ചെയ്തപ്പോള്‍ ക്രൂരമായി മര്‍ദിക്കുകയും അടിവസ്ത്രം മാത്രം ധരിപ്പിച്ച് നിര്‍ബന്ധിച്ച് നിര്‍ത്തിക്കുകയുമായിരുന്നു. പീഡനത്തിനിടെ കുട്ടികള്‍ ഭയന്ന് നിലവിളിച്ചപ്പോള്‍ വായില്‍ തുണി തിരുകി ബെല്‍റ്റുകളും വസ്ത്രങ്ങള്‍ തൂക്കുന്ന ഹാങ്കറുകളും ഉപയോഗിച്ച് ക്രൂരമായി മര്‍ദ്ദിച്ചു. വെള്ളം ചോദിച്ചപ്പോള്‍ മലിനജലം കുടിക്കാന്‍ നിര്‍ബന്ധിച്ചതായും തയാറാകാതിരുന്നപ്പോള്‍ ദേഹത്ത് ഒഴിച്ചതായും പറയുന്നു. ഇതിന്റെ ദൃശ്യങ്ങള്‍ അക്രമികള്‍ മൊബൈല്‍ ഫോണില്‍ പകര്‍ത്തിയതായും വൈകിട്ട് 6 വരെ പീഡനം തുടര്‍ന്നതായും പരാതിയിലുണ്ട്.
വിദ്യാര്‍ഥി നാട്ടിലെത്തി മാതാപിതാക്കളെ വിവരമറിയിക്കുകയും തുടര്‍ന്നു വീട്ടുകാരോടൊപ്പം മംഗളൂരുവില്‍ തിരിച്ചെത്തി പോലീസില്‍ പരാതി നല്‍കുകയുമായിരുന്നു. സംഭവത്തില്‍ കേസെടുത്ത പോലീസ് അന്വേഷണം ഊര്‍ജ്ജിതമാക്കിയിട്ടുണ്ട്.
SUMMARY: Brutal ragging on a Malayali student; 5 Malayalis in custody
