ബെംഗളൂരു: കർണാടകയിലെ ബീദറില് ആറ് വയസ്സുകാരിയെ ടെറസിൽ നിന്ന് വീണ് മരിച്ച സംഭവത്തില് വഴിത്തിരിവ്. ഓഗസ്റ്റ് 27ന് നടന്ന സംഭവം അപകടമാണെന്ന് പെൺകുട്ടിയുടെ പിതാവ് സിധാന്ത് പോലീസിൽ റിപ്പോർട്ട് ചെയ്തു. കളിക്കുന്നതിനിടെ പെൺകുട്ടി മൂന്ന് നില കെട്ടിടത്തിന്റെ ടെറസിൽ നിന്ന് അബദ്ധത്തിൽ വീണു എന്നാണ് അദ്ദേഹം ആദ്യം പോലീസിനോട് പറഞ്ഞത്.
സെപ്റ്റംബർ 12 ന് ഒരു അയൽക്കാരൻ സിസിടിവി ദൃശ്യങ്ങൾ പങ്കിട്ടതോടെയാണ് വഴിത്തിരിവ് ഉണ്ടായത്. കുട്ടിയുടെ രണ്ടാനമ്മയായ രാധ കുട്ടിയെ കളിക്കാനെന്ന വ്യാജേന ടെറസിലേക്ക് വിളിക്കുകയും കുട്ടിയെ ഒരു കസേരയിൽ നിർത്തി ടെറസിൽ നിന്ന് തള്ളിയിടുകയും ചെയ്യുന്നത് സിസിടിവി ദൃശ്യങ്ങളിൽ ഉണ്ട്. കെട്ടിടത്തിന്റെ ടെറസിൽ കളിക്കുന്നതിനിടെ സാൻവി അബദ്ധത്തിൽ വീണതാണെന്നാണ് രാധ ഭർത്താവ് സിധാന്തിനോട് പറഞ്ഞത്. സംശയമൊന്നും തോന്നാതിരുന്നതിനാൽ മകൾ കളിക്കുന്നതിനിടെ അബദ്ധത്തിൽ വീണതാണെന്ന് അച്ഛൻ സിധാന്ത് പോലീസിൽ അറിയിച്ചു. രക്തത്തിൽ കുളിച്ചു കിടന്ന സാൻവിയെ ഉടൻ ആശുപത്രിയിൽ എത്തിച്ചെങ്കിലും അടുത്ത ദിവസം മരണം സംഭവിക്കുകയായിരുന്നു. അസ്വാഭാവിക മരണത്തിനാണ് പോലീസ് ആദ്യം കേസെടുത്തത്.എന്നാൽ സിസിടിവി ദൃശ്യങ്ങൾ പോലീസിന് കൈമാറിയതോടെയാണ് കേസിൽ വഴിത്തിരിവുണ്ടായത്.
ഈ ദൃശ്യത്തിന്റെ അടിസ്ഥാനത്തിൽ രാധയെ ചോദ്യം ചെയ്തതോടെ കുറ്റം സമ്മതിച്ചെന്ന് പോലീസ് പറഞ്ഞു. സിധാന്തിന് സാൻവിയോടുള്ള സ്നേഹം തനിക്ക് സഹിക്കാനായില്ലെന്നാണ് രാധ നൽകിയ മൊഴി. സ്വത്ത് തന്റെ രണ്ട് മക്കൾക്കു മാത്രമായി കിട്ടണമെന്ന് ആഗ്രഹിച്ചെന്നും രാധ പോലീസിനോട് പറഞ്ഞു. പൊലീസ് എഫ്ഐആർ രജിസ്റ്റർ ചെയ്ത് രാധയെ അറസ്റ്റ് ചെയ്തു. 2019ൽ സാൻവിയുടെ അമ്മ മരിച്ചതോടെ 2023ലാണ് സിധാന്ത് രാധയെ വിവാഹം ചെയ്തത്.
