ബെംഗളൂരു: കൊലചെയ്യപ്പെട്ടെന്ന് കരുതിയിരുന്ന യുവതി വർഷങ്ങൾക്കുശേഷം ജീവനോടെ തിരിച്ചെത്തി. പാണ്ഡവപുര സ്വദേശിനിയായ മഞ്ജുവാണ് നാഗമംഗളയിൽ ജീവനോടെ കണ്ടെത്തപ്പെട്ടത്. യുവതിയെ കൊലപ്പെടുത്തിയെന്ന ആരോപണത്തിൽ രണ്ടര വർഷത്തോളം ജയിലിൽ കഴിഞ്ഞ രാജേഷ് എന്നയാളുടെ ജീവിതമാണ് സംഭവത്തോടെ മാറിമറിഞ്ഞത്.
2019ലാണ് മഞ്ജുവിനെ കാണാതായത്. തുടർന്ന് പിതാവ് നാഗരാജു പോലീസിൽ പരാതി നൽകി. അന്വേഷണത്തിനിടെ മഞ്ജു അവസാനമായി വിളിച്ചത് രാജേഷിന്റെ മൊബൈൽ ഫോണിൽനിന്നാണെന്ന് കണ്ടെത്തിയതിനെത്തുടർന്ന് പോലീസിന് ഇയാളിൽ സംശയം തോന്നി. റാഗിമുദ്ദേനഹള്ളിയിലെ താമസക്കാരനായ രാജേഷിനെതിരെ 2021ൽ കൊലക്കേസ് രജിസ്റ്റർ ചെയ്തു. തുടർന്ന് അറസ്റ്റ് ചെയ്ത് ജയിലിലടച്ചു. ഏകദേശം രണ്ടര വർഷം വിചാരണത്തടവുകാരനായി കഴിഞ്ഞ രാജേഷ് 2024 ജനുവരിയിൽ ജാമ്യത്തിൽ പുറത്തിറങ്ങി.
താൻ ചെയ്യാത്ത കുറ്റം സമ്മതിക്കാൻ പോലീസ് നിർബന്ധിച്ചെന്നും ചോദ്യംചെയ്യലിനിടെ മർദിക്കുകയും വൈദ്യുതാഘാതം ഏൽപ്പിക്കുകയും ചെയ്തെന്നും രാജേഷ് ആരോപിച്ചിരുന്നു. കുടുംബാംഗങ്ങളെ അറസ്റ്റ് ചെയ്യുമെന്ന് ഭീഷണിപ്പെടുത്തിയതിനെത്തുടർന്നാണ് കുറ്റം സമ്മതിച്ചതെന്നും ഇയാൾ ആരോപിച്ചു.
രാജേഷിന്റെ അഭിഭാഷകൻ നടേഷിന് ലഭിച്ച വിവരങ്ങളുടെ അടിസ്ഥാനത്തിലാണ് മഞ്ജുവിനെ കണ്ടെത്താനുള്ള നീക്കം നടന്നത്. തുടർന്ന് നാഗമംഗള താലൂക്കിലെ ബിണ്ടിഗനവിലേ പോലീസ് സ്റ്റേഷനിൽ യുവതിയെ എത്തിച്ച് മൊഴിയെടുത്തു.
ഇഷ്ടമില്ലാത്ത വിവാഹം വീട്ടുകാർ നടത്തിയതിനെത്തുടർന്ന് താൻ സ്വമേധയാ വീടുവിട്ടുപോയതാണെന്നും കാമുകനായ നാഗേന്ദ്രയ്ക്കൊപ്പം താമസിക്കുകയായിരുന്നുവെന്നും മഞ്ജു പോലീസിനോട് പറഞ്ഞു. പിന്നീട് മറ്റൊരാളെ വിവാഹം കഴിച്ച് ജീവിതം തുടരുകയായിരുന്നുവെന്നും യുവതി പറഞ്ഞു. രാജേഷിനെ തനിക്ക് അറിയില്ലെന്നും ഇയാളുമായി യാതൊരു ബന്ധവുമില്ലെന്നും യുവതി വ്യക്തമാക്കി.
സംഭവത്തിൽ പോലീസിന്റെ മുൻ അന്വേഷണത്തിലെ വീഴ്ചകൾ പരിശോധിക്കാൻ മാണ്ഡ്യ ജില്ലാ പോലീസ് മേധാവി കേസ് ശ്രീരംഗപട്ടണ ഡിവൈ.എസ്.പിക്ക് കൈമാറി. അന്നത്തെ അന്വേഷണ ഉദ്യോഗസ്ഥരുടെ നടപടികളും രാജേഷിന്റെ ആരോപണങ്ങളും പരിശോധിക്കും.
SUMMARY: Woman presumed murdered returns alive; man spent two and a half years in jail in connection with the ‘murder’ case.
