തിരുവനന്തപുരം: മുഖ്യമന്ത്രി വിഡി സതീശൻ നടത്തിയ വിവാദ ചാർട്ടേഡ് വിമാനയാത്രയുടെ ചെലവുകള് വഹിച്ചത് ചിപ്സണ് ഏവിയേഷനാണെന്ന് വ്യക്തമാക്കുന്ന രേഖകള് പുറത്തുവന്നു. 19 ലക്ഷത്തിലേറെ രൂപയാണ് കമ്പനി ഇതിനായി അടച്ചിട്ടുള്ളതെന്ന് മാധ്യമങ്ങള് പുറത്തുവിട്ട വിവരങ്ങളില് പറയുന്നു. കർണാടക മന്ത്രിയും കോണ്ഗ്രസ് നേതാവുമായ കെജെ ജോർജിന്റെ കുടുംബത്തിന്റെ ഉടമസ്ഥതയിലുള്ള കേളചന്ദ്ര ഏവിയേഷന്റെ വിമാനമാണ് യാത്രയ്ക്ക് ഉപയോഗിച്ചത്.
ഈ വിമാനത്തിന്റെ സർവീസ് ചുമതല ചിപ്സണ് ഏവിയേഷനാണ്. സംസ്ഥാന സർക്കാരിന് കഴിഞ്ഞ മൂന്ന് വർഷമായി ഹെലികോപ്റ്റർ സേവനം നല്കിവരുന്ന ഈ കമ്പനി, നിലവിലെ കരാർ പുതുക്കാനുള്ള ശ്രമങ്ങള് നടത്തുന്നതിനിടയിലാണ് മുഖ്യമന്ത്രിയുടെ യാത്രാ വിവാദം പുറത്തുവരുന്നത്. മലപ്പുറത്തെ മഴക്കെടുതി വിലയിരുത്താനായി തിരുവനന്തപുരത്ത് നിന്ന് കരിപ്പൂരിലേക്ക് മുഖ്യമന്ത്രി നടത്തിയ ഈ സ്വകാര്യ യാത്ര വലിയ രാഷ്ട്രീയ പോരിനാണ് വഴിതുറന്നിരിക്കുന്നത്. സ്പോണ്സേഡ് യാത്രകള് ഇനിയും തുടരുമെന്ന വിഡി സതീശന്റെ നിലപാടിനെതിരെ പ്രതിപക്ഷം പ്രതിഷേധം ശക്തമാക്കിയിട്ടുണ്ട്.
വിഷയത്തില് കോണ്ഗ്രസിനുള്ളിലും ശക്തമായ അതൃപ്തി നിലനില്ക്കുന്നുണ്ട്. മന്ത്രിമാരുടെ വിദേശയാത്രയും മറ്റ് സാമ്പത്തിക വിഷയങ്ങളും ചൂണ്ടിക്കാട്ടി പ്രതിപക്ഷം സർക്കാരിനെതിരായ വിമർശനങ്ങള് കടുപ്പിക്കുന്നതിനിടെയാണ് യാത്രാ വിവാദത്തില് മുഖ്യമന്ത്രിയുടെ പ്രതികരണമെത്തിയത്. മുൻ മുഖ്യമന്ത്രി പിണറായി വിജയന്റെ കാലത്തെ യാത്രകളെ ഓർമ്മിപ്പിച്ചായിരുന്നു സതീശന്റെ ന്യായീകരണം. എന്നാല് സർക്കാർ അഴിമതിയുടെയും ധൂർത്തിന്റെയും പ്രതിരൂപമായി മാറിയെന്ന് ആരോപിച്ച് പ്രതിപക്ഷം ആക്രമണം കൂടുതല് കടുപ്പിച്ചിട്ടുണ്ട്.
SUMMARY: Chief Minister V.D. Satheesan’s chartered flight journey; records indicate Chipson Aviation bore the cost
