ബെംഗളൂരു: കനത്ത മഴയിൽ തടാകത്തിൽ മുങ്ങിമരിച്ച സഹോദരങ്ങളുടെ കുടുംബത്തിന് നഷ്ടപരിഹാരം പ്രഖ്യാപിച്ച് സംസ്ഥാന സർക്കാർ. ശ്രീനിവാസ് (13), ലക്ഷ്മി (11) എന്നിവരാണ് മരിച്ചത്. കുട്ടികളുടെ കുടുംബത്തിന് ബിബിഎംപിയിൽ നിന്ന് അഞ്ച് ലക്ഷം രൂപ നഷ്ടപരിഹാരം നൽകുമെന്ന് ഉപമുഖ്യമന്ത്രി ഡി. കെ. ശിവകുമാർ പറഞ്ഞു.
കെംഗേരി തടാകത്തിൽ തിങ്കഴാഴ്ച വൈകീട്ട് 6 മണിയോടെയാണ് കുട്ടികളെ കാണാതായത്. പിന്നീട് നടന്ന തിരച്ചിലിൽ ഇരുവരുടെയും മൃതദേഹം കണ്ടെടുക്കുകയായിരുന്നു. ഇവർ തടാകത്തിൽ വെള്ളം എടുക്കാൻ പോയതായിരുന്നു. ആദ്യം ലക്ഷ്മിയാണ് തടാകത്തിലേക്ക് വീണത്. സഹോദരി വെള്ളത്തിൽ മുങ്ങിത്താണതോടെ പെൺകുട്ടിയെ രക്ഷിക്കാനാണ് ശ്രീനിവാസ് വെള്ളത്തിലേക്ക് എടുത്ത് ചാടിയത്.
എന്നാൽ രണ്ട് പേരും വെള്ളത്തിലേക്ക് താഴ്ന്ന് പോകുകയായിരുന്നു. പ്രദേശത്ത് പെയ്ത കനത്ത മഴ കാരണം തടാകത്തിലെ ജലനിരപ്പ് ഉയർന്നതാണ് അപകടകാരണമെന്ന് ശിവകുമാർ പറഞ്ഞു. ഇതിന് പുറമെ നഗരത്തിൽ പെയ്ത മഴയിൽ വെള്ളം കയറിയ വീടുകളുടെ ഉടമകൾക്ക് 10,000 രൂപ നഷ്ടപരിഹാരം പ്രഖ്യാപിച്ചതായും മന്ത്രി അറിയിച്ചു.
TAGS: BENGALURU | DROWNED
SUMMARY: Compensation announced for siblings family drowed in lake
