കണ്ണൂർ: എ ഡി എം നവീൻ ബാബുവിന്റെ മരണത്തില്‍ വിവാദ പെട്രോള്‍ പമ്പ് അപേക്ഷകൻ ടി വി പ്രശാന്തിനെ പരിയാരം മെഡിക്കല്‍ കോളേജിലെ ജോലിയില്‍ നിന്ന് സസ്പെൻഡ് ചെയ്തു. അന്വേഷണ വിദേയമായാണ് സസ്പെൻഷൻ. ആരോഗ്യവകുപ്പാണ് സസ്പെൻഡ് ചെയ്ത് കൊണ്ട് ഉത്തരവിറക്കിയത്.
മെഡിക്കല്‍ കോളജിലെ ഇലക്‌ട്രിക്കല്‍ ഹെല്‍പ്പറാണ് ഇയാള്‍. നവീൻ കൈക്കൂലി വാങ്ങിയെന്ന് ആരോപിച്ച്‌ പരാതി നല്‍കിയ ആളാണ് പ്രശാന്തൻ. ആരോഗ്യ വകുപ്പിന്റെ അന്വേഷണത്തിനു ശേഷമാണ് പ്രശാന്തനെ സസ്പെൻഡ് ചെയ്തത്. സർക്കാർ സർവീസിലിരിക്കെ പമ്പിന് അപേക്ഷിച്ചത് ചട്ടലംഘനമെന്ന ചൂണ്ടിക്കാട്ടിയാണ് നടപടി.
കടുത്ത നടപടി പിന്നീടുണ്ടാകുമെന്നാണ് വിവരം. പ്രശാന്തൻ നല്‍കിയ പരാതി വ്യാജമാണെന്ന ആരോപണം ശക്തമായിരിക്കെയാണ് വകുപ്പ് നടപടി സ്വീകരിച്ചത്. നവീന്‍ ബാബു ഒക്ടോബര്‍ ആറിന് താമസസ്ഥലത്തേക്ക് വിളിച്ചുവരുത്തി ഒരു ലക്ഷം രൂപ കൈക്കൂലിയായി ആവശ്യപ്പെട്ടുവെന്നും 98,500 രൂപ നല്‍കിയെന്നുമാണ് പ്രശാന്തൻ മുഖ്യമന്ത്രിക്ക് നല്‍കിയതെന്ന് പറയുന്ന പരാതിയിലുള്ളത്.
ഇതുമായി ബന്ധപ്പെട്ട് പലതവണ പോലീസ് ഇയാളെ വിളിപ്പിക്കുകയും ചോദ്യം ചെയ്യുകയും ചെയ്തിരുന്നു. സ്വർണം പണയം വെച്ചാണ് പണം നല്‍കിയതെന്ന് ഇയാള്‍ പോലീസിന് മൊഴി നല്‍കി. പ്രശാന്തന്‍റേതെന്ന നിലയില്‍ പുറത്തുവന്ന പരാതിയുടെ കോപ്പിയില്‍ വ്യാജ ഒപ്പാണെന്ന് തെളിഞ്ഞിരുന്നു. ഇതോടെ പ്രശാന്തന്‍റെ പേരില്‍ വ്യാജ പരാതി ചമച്ചതാണെന്നും ആരോപണം ഉയർന്നു.
സർക്കാർ ജീവനക്കാരനായ പ്രശാന്ത് പെട്രോള്‍ പമ്പ് തുടങ്ങിയത് നിയമവിരുദ്ധമാണെന്ന് ചൂണ്ടിക്കാട്ടി എൻജിഒ അസോസിയേഷൻ പരാതി നല്‍കിയിരുന്നു. കൈക്കൂലി നല്‍കുന്നതും നിയമവിരുദ്ധമാണെന്നിരിക്കെ പ്രശാന്തിനെതിരെ അഴിമതി നിരോധന നിയമപ്രകാരം കേസെടുക്കണമെന്നും എൻജിഒ അസോസിയേഷൻ മെഡിക്കല്‍ എജ്യുക്കേഷൻ ഡയറക്ടർക്ക് നല്‍കിയ പരാതിയില്‍ ആവശ്യപ്പെട്ടിരുന്നു.
TAGS : ADM NAVEEN BABU DEATH | SUSPENDED
SUMMARY : ADM’s death: Controversial petrol pump applicant TV Prasanthan suspended
