ബെംഗളൂരു: കർണാടകയിൽ വരൾച്ചയെ തുടർന്ന് കാർഷിക മേഖലയ്ക്കുണ്ടായ നഷ്ടം 46,324.50 കോടിയായി കണക്കാക്കിയതായി സംസ്ഥാന സർക്കാർ. 177 താലൂക്കുകളിലായി ഏകദേശം 47.09 ലക്ഷം ഹെക്ടർ കൃഷിയിടങ്ങളിലെ വിളകൾക്ക് നാശമുണ്ടായതായാണ് പ്രാഥമിക വിലയിരുത്തൽ.
വരൾച്ചാ ദുരിതാശ്വാസത്തിനായി ദേശീയ ദുരന്ത പ്രതികരണ നിധിയിൽ നിന്ന് 7,142.64 കോടി കേന്ദ്രസഹായമായി അനുവദിക്കണമെന്ന് സംസ്ഥാന സർക്കാർ ആവശ്യപ്പെട്ടിട്ടുണ്ട്. ഇതിൽ കർഷകർക്ക് ഇൻപുട്ട് സബ്സിഡിയായി നൽകുന്നതിനായി 4,998.60 കോടിയും കാലിത്തീറ്റ, കുടിവെള്ളം ഉൾപ്പെടെയുള്ള മറ്റ് ദുരിതാശ്വാസ പ്രവർത്തനങ്ങൾക്കായി 2,144.04 കോടിയും ഉൾപ്പെടുന്നു.
തുവര, ചോളം, പരുത്തി, കരിമ്പ്, സോയാബീൻ, ചെറുപയർ തുടങ്ങിയ പ്രധാന വിളകൾക്ക് വ്യാപകമായ നാശമുണ്ടായതായാണ് സർക്കാർ കണക്ക്. തോട്ടവിളകളെയും വരൾച്ച സാരമായി ബാധിച്ചിട്ടുണ്ട്.
നാശനഷ്ടങ്ങൾ നേരിട്ട് വിലയിരുത്തുന്നതിനായി കേന്ദ്രത്തിൽ നിന്നുള്ള അന്തർമന്ത്രാലയ സംഘം കർണാടകയിലെ വിവിധ പ്രദേശങ്ങൾ സന്ദർശിക്കുന്നുണ്ട്.
സംഘത്തിന്റെ റിപ്പോർട്ടിന്റെ അടിസ്ഥാനത്തിലായിരിക്കും കേന്ദ്രസഹായത്തിൽ അന്തിമ തീരുമാനം ഉണ്ടാകുക.
വരൾച്ചാബാധിത കർഷകർക്ക് സംസ്ഥാന സർക്കാർ ഇടക്കാല സഹായവും പ്രഖ്യാപിച്ചിട്ടുണ്ട്.
നിലവിലെ സ്ഥിതിഗതികൾ വിലയിരുത്തുന്നതിനും കൂടുതൽ പ്രദേശങ്ങളെ വരൾച്ചാബാധിതമായി പ്രഖ്യാപിക്കുന്നതിനുമുള്ള നടപടികളും തുടരുകയാണ്.
SUMMARY: Drought losses in Karnataka amount to ₹46,324 crore.
