ബെംഗളൂരു: കർണാടക പൊതുമരാമത്ത് മന്ത്രിയും മുതിർന്ന കോൺഗ്രസ് നേതാവുമായ സതീഷ് ജാർക്കിഹോളിയുടെയും ബന്ധുക്കളുടെയും വീടുകളിലും സ്ഥാപനങ്ങളിലും എൻഫോഴ്സ്മെന്റ് ഡയറക്ടറേറ്റ്(ഇ.ഡി.) പരിശോധന. ബെംഗളൂരു, ബെളഗാവി, ഗോവ എന്നിവിടങ്ങളിലെ 18 കേന്ദ്രങ്ങളിലാണ് പരിശോധന നടത്തിയത്.
സതീഷ് ജാർക്കിഹോളിയുടെ മകളും ലോക്സഭാംഗവുമായ പ്രിയങ്കയുടെ വീട്ടിലും പരിശോധന നടന്നു. വിദേശനാണ്യവിനിമയ ചട്ട (ഫെമ) ലംഘനത്തെ തുടർന്നുള്ള കേസിലാണിതെന്നാണ് സൂചന. ഇ.ഡി. അധികൃതർ കൂടുതൽ വിവരങ്ങൾ വെളിപ്പെടുത്തിയിട്ടില്ല. ബെളഗാവിയിലെ ചിക്കോഡിയിൽ നിന്നുള്ള കോൺഗ്രസ് എംപിയാണ് പ്രിയങ്ക.
ആഫ്രിക്കയിലെ വിദ്യാഭ്യാസ സ്ഥാപനങ്ങളിൽ നിക്ഷേപമുള്ള ജാർക്കിഹോളി കുടുംബത്തിന്റെ വിദേശ നിക്ഷേപവും വിദേശ യാത്രകളും സംബന്ധിച്ച രേഖകളാണ് ഇ.ഡി പ്രധാനമായും പരിശോധിച്ചത്.
ജൂണിൽ സതീഷ് ജാർക്കിഹോളിയുടെ സഹോദരീ ഭർത്താവും എക്സൈസ് അഡിഷനൽ കമ്മിഷണറുമായ വൈ.മഞ്ചുനാഥിന്റെ വീട്ടിലും ഓഫിസിലും ഇ.ഡി റെയ്ഡ് നടത്തിയിരുന്നു. എക്സൈസ് അഴിമതിയെ തുടർന്നുള്ള ലോകായുക്ത കേസിന്റെ തുടർച്ചയായിട്ടായിരുന്നു റെയ്ഡ്.
പഞ്ചസാര ഫാക്ടറി ഉടമകളാണ് ജാർക്കിഹോളി കുടുംബം. 2013–16 വരെ സതീഷ് എക് സൈസ് മന്ത്രിയായിരുന്നു. ബി.ജെ.പി. നേതാക്കളായ രമേഷ് ജാർക്കിഹോളി, ബാലചന്ദ്ര ജാർക്കിഹോളി എന്നിവർ സതീഷ് ജാർക്കിഹോളിയുടെ സഹോദരങ്ങളാണ്.
SUMMARY: ED searches at Minister Satish Jarkiholi’s homes
