ബെംഗളൂരു: നഗരത്തിലെ നടപ്പാതകളുടെ ശോചനീയാവസ്ഥ സംബന്ധിച്ച് ബിബിഎംപിയോടും ബെംഗളൂരു പോലീസിനോടും വിശദീകരണം തേടി കർണാടക ഹൈക്കോടതി. നടപ്പാതകളുടെ പരിപാലനം സംബന്ധിച്ച് സന്നദ്ധസംഘടനയായ ലെറ്റ്സ്കിറ്റ് ഫൗണ്ടേഷൻ നൽകിയ പൊതുതാൽപര്യ ഹർജി പരിഗണിച്ചാണ് നടപടി. സെപ്റ്റംബർ 24നകം ഇതുസംബന്ധിച്ച വിശദീകരണം നൽകണമെന്നാണ് നിർദേശം.
നഗരത്തിലെ നടപ്പാതകളിൽ ഭൂരിഭാഗവും ഭിന്നശേഷി സൗഹൃദമല്ലെന്ന് ഹർജിയിൽ ചൂണ്ടിക്കാട്ടുന്നു. ഒപ്പം നടപ്പാതകൾ കയ്യേറി നിർമാണങ്ങളും വഴിയോര കച്ചവടങ്ങളും പതിവാണ്. 3 വർഷം മുൻപാണ് ഇതു സംബന്ധിച്ച് ഹർജി നൽകിയത്. എന്നാൽ ഇപ്പോഴും സ്ഥിതിയിൽ മാറ്റമില്ലെന്നും ഹർജിക്കാർ കോടതിയെ അറിയിച്ചു.
നഗരത്തിലെ നടപ്പാതകളുടെ ശോചനീയാവസ്ഥയ്ക്കു തെളിവായി ചിത്രങ്ങൾ ഉൾപ്പെടെ കോടതിയിൽ സമർപ്പിച്ചു. നടപ്പാതകൾ തകർന്നത് വാഹനാപകടങ്ങളിൽ മരിക്കുന്ന കാൽനടയാത്രക്കാരുടെ എണ്ണം വർധിക്കാൻ ഉൾപ്പെടെ ഇടയാക്കിയിട്ടുണ്ട്.
SUMMARY: Karnataka HC issues notices to state, BBMP & city police on footpath maintenance.
