പത്തനംതിട്ട: ശബരിമലയില്‍ ഇന്നും വൻ ഭക്തജനത്തിരക്ക് അനുഭവപ്പെട്ടു. ഉച്ചയ്ക്ക് 12 മണി വരെ 45,875 പേരാണ് ദർശനം പൂർത്തിയാക്കിയത്. ഒരു മണിക്കൂറില്‍ ശരാശരി 3,875 പേർ പതിനെട്ടാംപടി ചവിട്ടുന്നുണ്ട്. മരക്കൂട്ടം മുതല്‍ രാവിലെ വലിയ തിരക്ക് അനുഭവപ്പെട്ടതിനെത്തുടർന്ന് ഘട്ടംഘട്ടമായാണ് ഭക്തരെ സന്നിധാനത്തേക്ക് പ്രവേശിപ്പിക്കുന്നത്.
ഇന്നലെ മാത്രം 92,041 ഭക്തരാണ് ദർശനം നടത്തിയത്. അതേസമയം, സംസ്ഥാന പോലീസ് മേധാവി ഷെയ്ഖ് ദർവേസ് സാഹിബ് ശബരിമലയിലെത്തി ദർശനം നടത്തുകയും, വൈകുന്നേരത്തോടെ മലയിറങ്ങുകയും ചെയ്യും. ശബരിമല മണ്ഡല പൂജയോടനുബന്ധിച്ചുള്ള വെർച്വല്‍ ക്യൂ ബുക്കിംഗ് ആരംഭിച്ചു. ഡിസംബർ 26, 27 തീയതികളിലേക്കുള്ള സ്ലോട്ടുകളാണ് ഇപ്പോള്‍ ബുക്ക് ചെയ്യാൻ സാധിക്കുക.
ഇതില്‍ ഡിസംബർ 26-ന് 30,000 പേർക്കും ഡിസംബർ 27-ന് 35,000 പേർക്കും വെർച്വല്‍ ക്യൂ വഴി ദർശനത്തിന് അവസരം ലഭിക്കും. ഈ രണ്ടു ദിവസങ്ങളിലും സ്പോട്ട് ബുക്കിംഗ് വഴി 5,000 ഭക്തരെ വീതം അധികമായി അനുവദിക്കുന്നതാണ്. sabarimalaonline.org എന്ന വെബ്സൈറ്റ് വഴിയാണ് ഭക്തർ ദർശനത്തിനുള്ള സ്ലോട്ടുകള്‍ മുൻകൂട്ടി ബുക്ക് ചെയ്യേണ്ടത്.
SUMMARY: Huge crowd of devotees continues at Sabarimala; Virtual queue booking for Mandala Pooja has begun
