ബെംഗളൂരു: ബെംഗളൂരുവിൽ വൻ മയക്കുമരുന്ന് വേട്ട. ഡൽഹിയിൽ നിന്നും ട്രെയിനില്‍ ബെംഗളൂരുവിലേക്ക് കടത്തിയ 9 കോടി രൂപയുടെ മയക്കുമരുന്ന് ഡയറക്ടറേറ്റ് ഓഫ് റവന്യൂ ഇന്റലിജൻസ് (ഡിആർഐ) പിടികൂടി. ഡൽഹി-ബെംഗളൂരു രാജധാനി എക്സ്പ്രസ് വഴിയാണ് മയക്കുമരുന്ന് കടത്തിയത്.
ഡിആര്‍ഐ ഉദ്യോഗസ്ഥര്‍ക്ക് ലഭിച്ച വിവരങ്ങളുടെ അടിസ്ഥാനത്തിൽ നടത്തിയ പരിശോധനയിലാണ് ഇവ കണ്ടെത്തിയത്. നായകള്‍ക്ക് നൽകാനുള്ള ഭക്ഷണ പാക്കറ്റുകളിൽ ലഹരിവസ്തുക്കൾ ഒളിപ്പിച്ച് കടത്തുകയായിരുന്നു. സംഭവത്തിൽ ഒരാളെ അറസ്റ്റ് ചെയ്തിട്ടുണ്ട്. ഇയാളുടെ ബെംഗളൂരുവിലെ വസതിയിൽ നടത്തിയ പരിശോധനയിൽ വൻതോതിൽ ഉള്ള ഡിജിറ്റൽ സാമ്പത്തിക ഇടപാടുകൾ ഉദ്യോഗസ്ഥർ സ്ഥിരീകരിച്ചിട്ടുണ്ട്. 40ലേറെ ഡെബിറ്റ് കാർഡുകളും 70ലധികം സിംകാർഡുകളും പോലീസ് കണ്ടെത്തിയിട്ടുണ്ട്. ഇയാളെ ചോദ്യം ചെയ്തതിൽ നിന്നും രണ്ടുപേരെ കൂടി കസ്റ്റഡിയിലെടുത്തു. കള്ളപ്പണം വെളുപ്പിക്കൽ, നിയമവിരുദ്ധ ഇടപാടുകൾ എന്നിവയിൽ ഉൾപ്പെട്ടിരിക്കാൻ സാധ്യതയുള്ള വന്‍ ശൃംഖല ഇവര്‍ക്ക് പിന്നിലുള്ളതായി അധികൃതര്‍ സംശയിക്കുന്നു. കൂടുതൽ അന്വേഷണം നടന്നുവരികയാണ്.
SUMMARY: Huge drug bust in Bengaluru; One arrested with drugs worth Rs 9 crore
