കൊച്ചിയിലേക്ക് വന്ന വിമാനത്തില്‍ മലയാളി യുവാവിന്റെ പരാക്രമം; എമര്‍ജൻസി വാതില്‍ തുറക്കാൻ ശ്രമം

കൊച്ചി: വിമാനയാത്രക്കിടെ എമർജൻസി വാതില്‍ തുറക്കാൻ ശ്രമിച്ച മലയാളി അറസ്റ്റില്‍. മലേഷ്യയിലെ ക്വാലാലംപൂരില്‍ നിന്ന് കൊച്ചിയിലേയ്ക്ക് പറന്ന വിമാനത്തിലായിരുന്നു സംഭവം. പാലക്കാട് സ്വദേശി ജംഷീർ അത്താണിക്കല്‍ (36) ആണ് അറസ്റ്റിലായത്. ഇയാളെ ചോദ്യം ചെയ്യുകയാണെന്ന് നെടുമ്പാശേരി പോലീസ് അറിയിച്ചു.

ഇന്നലെ രാത്രി 9.30നും 11.05നും ഇടയിലായിരുന്നു സംഭവം. ഒഡി 231-ാം നമ്പർ വിമാനത്തില്‍ സീറ്റ് നമ്പർ 12എയിലായിരുന്നു ജംഷീർ യാത്ര ചെയ്തത്. പെട്ടെന്ന് ഇയാള്‍ എമർജൻസി വാതില്‍ ബലമായി തുറക്കാൻ ശ്രമിക്കുകയും എമർജൻസി വിൻഡോ പാനല്‍ അടിച്ചു തകർക്കുകയുമായിരുന്നുവെന്നാണ് എഫ്‌ഐആറില്‍ പറയുന്നത്. തടയാൻ ശ്രമിച്ച മറ്റ് യാത്രക്കാരെയും ക്യാബിൻ ക്രൂവിനെയും യുവാവ് ഭീഷണിപ്പെടുത്തിയതായും പോലീസ് പറയുന്നു. തുടർന്ന് എല്ലാവരും ചേർന്ന് ഇയാളെ ബലമായി പിടിച്ചുമാറ്റുകയായിരുന്നു.

രാത്രി 11.10ഓടെയാണ് വിമാനം കൊച്ചിയില്‍ ലാൻഡ് ചെയ്തത്. ബാട്ടിക് എയർലൈൻസ് സെക്യൂരിറ്റി ഇൻ ചാർജ് ബിന്ദു മോഹൻ നല്‍കിയ പരാതിയുടെ അടിസ്ഥാനത്തിലാണ് ജംഷീറിനെതിരെ പോലീസ് എഫ്‌ഐആർ ചുമത്തിയത്. ജംഷീർ ഒറ്റയ്ക്കാണ് യാത്ര ചെയ്തതെന്നാണ് വിവരം. ഇയാളുടെ പശ്ചാത്തലമടക്കം പരിശോധിക്കുമെന്ന് പോലീസ് അറിയിച്ചു.

SUMMARY: Malayali youth creates a scene on a flight to Kochi; attempts to open emergency door