കൊച്ചി: മൂന്ന് പേരുടെ മരണത്തിനിടയാക്കിയ നെടുമ്പാശ്ശേരി വാഹനാപകടത്തിലെ പ്രതികളെ പോലീസ് കസ്റ്റഡിയില്‍ വിട്ടു. നാളെ വൈകീട്ട് അഞ്ചു മണി വരെയാണ് നാല് പ്രതികളെ കസ്റ്റഡിയില്‍ വിട്ടിരിക്കുന്നത്. കഴിഞ്ഞ ദിവസം പോലീസ് നല്‍കിയ കസ്റ്റഡി അപേക്ഷ കോടതി ശരിവെക്കുകയായിരുന്നു. പ്രധാനപ്രതി സുഹൈലിൻ്റെയും സൃഹൃത്തുകളെയും ചോദ്യം ചെയ്യലിനായും തെളിവെടുപ്പിനുമാണ് പോലീസ് കസ്റ്റഡി അപേക്ഷ നല്‍കിയത്.
ഞായറാഴ്ച പുലർച്ചെയായിരുന്നു പ്രതികള്‍ സഞ്ചരിച്ച മിനി കൂപ്പർ ബൈക്കില്‍ ഇടിച്ചുണ്ടായ അപകടത്തില്‍ മൂന്നുപേർ മരിച്ചത്. പാലക്കാട് സ്വദേശിനി ഗോപിക, വയനാട് സ്വദേശിനി ദേവിക, കർണാടക സ്വദേശി ഇജാസ് എന്നിവരാണ് മരിച്ചത്. കാർ അമിത വേഗതയിലെത്തി സ്കൂട്ടറില്‍ ഇടിക്കുകയായിരുന്നു. മദ്യപിച്ചായിരുന്നു ആലപ്പുഴ സ്വദേശി സുഹൈല്‍ സജീവ് കാർ ഓടിച്ചിരുന്നത്. അപകടത്തില്‍ പ്രതിക്കെതിരെ നെടുമ്പാശ്ശേരി പോലീസ് നരഹത്യയ്ക്ക് കേസെടുത്തിരുന്നു. പ്രതിക്ക് മദ്യം നല്‍കിയ ബാറിനെതിരെയും കേസെടുത്തിട്ടുണ്ട്.
SUMMARY: Nedumbassery Mini Cooper accident: Four people, including Suhail, remanded to police custody
