തൃശൂര്: കുറഞ്ഞ വേതനം 40,000 രൂപയാക്കി ഉയര്ത്തണമെന്ന് ആവശ്യപ്പെട്ട് സംസ്ഥാനത്തെ സ്വകാര്യ ആശുപത്രി നഴ്സുമാർ ശനിയാഴ്ച സൂചന പണിമുടക്ക് നടത്തും. ആശുപത്രികളിലെ മൂന്നിലൊന്ന് ജീവനക്കാര് ജോലിക്ക് കയറി, ബാക്കിയുള്ളവര് സമരത്തില് പങ്കെടുക്കുമെന്ന് യുനൈറ്റഡ് നഴ്സസ് അസോസിയേഷൻ (യു.എൻ.എ) ദേശീയ അധ്യക്ഷന് ജാസ്മിന് ഷാ അറിയിച്ചു. പണിമുടക്കിന്റെ ഭാഗമായി തൃശ്ശൂരില് അവകാശ പ്രഖ്യാപന സമ്മേളനവും സംഘടിപ്പിക്കും.
ശമ്പള വര്ധന ഉള്പ്പെടെയുള്ള ആവശ്യം ഉന്നയിച്ചാണ് നഴ്സുമാരും മറ്റ് ആശുപത്രി ജീവനക്കാരും സമരം നടത്തുന്നത്. തുല്യജോലിക്ക് തുല്യ വേതനം, നഴ്സുമാര്ക്ക് അടിസ്ഥാന ശമ്പളം 40,000 രൂപയാക്കുക, മറ്റു ആശുപത്രി ജീവനക്കാര്ക്ക് ആനുപാതികമായ ശമ്പള വര്ധന, യു ജി സി സ്കെയില് ശമ്പളം നടപ്പിലാക്കുക, ഡോ. ബല്റാം കമ്മിറ്റി, ജഗദീഷ് പ്രസാദ് കമ്മിറ്റി, വീരകുമാര് കമ്മിറ്റി റിപ്പോര്ട്ടുകള് നടപ്പിലാക്കുക തുടങ്ങിയ ആവശ്യങ്ങളാണ് സമരക്കാര് മുന്നോട്ട് വെക്കുന്നത്.
SUMMARY: Nurses in private hospitals to go on strike today
