തിരുവനന്തപുരം: തിരുവനന്തപുരം നഗരത്തെ ഞെട്ടിച്ച സ്വ‍‌ർണക്കൊള്ള കേസിൽ 6 പേർ പിടിയിൽ. 4 പേരെ വയനാട്ടിലെ പടിഞ്ഞാറേത്തറയിൽ നിന്നും 2 പേരെ തിരുവനന്തപുരത്തു നിന്നുമാണ് അറസ്റ്റ് ചെയ്തത്. തമിഴ്നാട്, ബെംഗളൂരു, മൈസൂരു എന്നിവിടങ്ങളിലൂടെ നീങ്ങിയ പ്രതികളെ പിന്തുടർന്നാണ് വയനാട്ടിൽ വച്ച് പിടികൂടിയത്. ജ്വല്ലറി ഉടമയായ മഹാരാഷ്ട്ര സ്വദേശി നന്ദകുമാറുമായി സ്വർണ വ്യാപാരം നടത്തുന്നവരാണു കവർച്ചയ്ക്കു പിന്നിലെന്നു പോലീസ് സ്ഥിരീകരിച്ചു. കുറച്ച് സ്വര്‍ണവും പ്രതികളില്‍ നിന്ന് പിടിച്ചെടുത്തു. പ്രതികളില്‍ ഒരാള്‍ ഓടി രക്ഷപ്പെട്ടു. പ്രതികള്‍ സഞ്ചരിച്ച വാഹനവും പോലിസ് കസ്റ്റഡിയിലെടുത്തു. പ്രതികളെ വിശദമായി ചോദ്യം ചെയ്യുകയാണ്.
സിറ്റി പോലീസ് കമീഷണർ അരുൾ ആർ.ബി. കൃഷ്ണയുടെ നേതൃത്വത്തിൽ വിവിധ സംഘങ്ങളായി തിരിഞ്ഞുള്ള അന്വേഷണമാണ് പ്രതികളെ കുടുക്കിയത്. മോഷണശേഷം രക്ഷപ്പെട്ട സംഘം ബൈക്ക് ഉപേക്ഷിച്ച് കാറിൽ ദേശീയപാത വഴി തമിഴ്നാട്ടിലേക്ക് കടക്കുകയായിരുന്നു. പോലീസ് പിന്തുടരുന്നെന്ന് മനസ്സിലാക്കിയ ഇവർ തമിഴ്നാട്ടിൽനിന്ന് വയനാട് ഭാഗത്തേക്ക് എത്തിയപ്പോൾ പോലീസ് വാഹനം വളഞ്ഞ് നാലുപേരെ പിടികൂടുകയായിരുന്നു. കവർച്ച ചെയ്ത കുറച്ച് സ്വർണം ഇവരിൽനിന്ന് കണ്ടെടുത്തതായി അറിയുന്നു. വിശദാംശങ്ങൾ പോലീസ് വെളിപ്പെടുത്തിയില്ല.
കഴിഞ്ഞ ദിവസമാണ് ചാല മാര്‍ക്കറ്റിലെ ജ്വല്ലറി ഉടമയില്‍ നിന്നും 250 പവന്‍ സ്വര്‍ണം പിടിച്ചുപറിക്കുന്ന സാഹചര്യമുണ്ടായത്. തിരുവനന്തപുരം ചാലയില്‍ സഭാവതി കോവില്‍ റോഡിലാണ് സംഭവമുണ്ടായത്. രാത്രി പത്തു മണിക്ക് ശേഷം ജ്വല്ലറി പൂട്ടി സ്വര്‍ണമടങ്ങിയ ബാഗുമായി നന്ദകുമാര്‍ പിന്‍വാതിലിലൂടെയാണ് ഇറങ്ങിയത്. ബാഗ് ശരീരത്തില്‍ തൂക്കിയിട്ട് സ്‌കൂട്ടറില്‍ വീട്ടിലേയ്ക്ക് തിരിച്ചു. ബൈക്കിലെത്തിയ രണ്ട് പേരാണ് ഉടമയില്‍ നിന്ന് സ്വര്‍ണം അടങ്ങിയ ബാഗ് പിടിച്ചുപറിച്ചത്.
SUMMARY: Gold stolen from a jewellery owner in the capital; six people arrested.
