ബെംഗളൂരു: വൈറ്റ്ടോപ്പിങ്ങ് പ്രവൃത്തികള് നടക്കുന്നതിനാല് മജസ്റ്റിക്കിനെ മല്ലേശ്വരം, ശിവാജിനഗര് എന്നിവിടങ്ങളുമായി ബന്ധിപ്പിക്കുന്ന പ്രധാന റോഡായ റേസ് കോഴ്സ് റോഡ് ഇന്ന് മുതല് 2 മാസത്തേക്ക് അടച്ചിടും.
ഏകദേശം 15 ദിവസത്തെ വീതമുള്ള നാല് ഘട്ടങ്ങളിലായാണ് വൈറ്റ്ടോപ്പിങ്ങ് പ്രവൃത്തി നടക്കുക, പുതിയ മഴവെള്ള ഡ്രെയിനേജ്, മലിനജല ലൈന്, മറ്റ് യൂട്ടിലിറ്റി ജോലികള് എന്നിവയുടെ നിര്മ്മാണം ഇതില് ഉള്പ്പെടും. ആദ്യ രണ്ട് ഘട്ടങ്ങള് 30 ദിവസത്തിനുള്ളില് പൂര്ത്തിയാകുമെന്ന് പ്രതീക്ഷിക്കുന്നു.
ഒന്നാം ഘട്ടത്തില് മയൂര ഹോട്ടല് ജംക്ഷന് മുതല് ഹരേകൃഷ്ണ റോഡ് ജംക്ഷന് വരെയുള്ള ഭാഗമാണ് അടച്ചിടുന്നത്. ഇതിലൂടെ വരുന്ന ബിഎംടിസി ബസുകള് ഉള്പ്പെടെ റേസ് വ്യൂ ജംക്ഷനില് നിന്ന് വലതു തിരിഞ്ഞു പോകണം. ട്രൈലൈറ്റ് ജംഗ്ഷനില് നിന്ന് റേസ് വ്യൂ ജംഗ്ഷനിലേക്ക് പോകുന്ന വാഹനങ്ങള് ഇടത്തേക്ക് തിരിയാന് അനുവദിക്കില്ല. ഹരേ കൃഷ്ണ റോഡ്, ഗുരുരാജ ജംഗ്ഷന്, ശിവാനന്ദ ജംഗ്ഷന് വഴി സഞ്ചരിച്ച് കുമാരകൃപ റോഡ് വഴി റേസ് കോഴ്സ് റോഡില് എത്തണം. മജസ്റ്റിക്കിലേക്ക് പോകുന്ന വാഹനങ്ങള് ഹരേ കൃഷ്ണ റോഡ്, എസ്സി റോഡ്, ശിവാനന്ദ ഫ്ലൈഓവര് എന്നിവ ഉപയോഗിക്കണം.
രണ്ടാം ഘട്ടത്തില്, മൗര്യ ഹോട്ടല് ജംഗ്ഷനും ഓള്ഡ് ജെഡിഎസ് ജംഗ്ഷനും ഇടയിലുള്ള പാതയുടെ ഇടതുവശം അടച്ചിടും. റേസ് കോഴ്സ് റോഡുമായി വീണ്ടും ബന്ധപ്പെടുന്നതിന് വാഹനങ്ങള് ആനന്ദ് റാവു സര്ക്കിള്, ലൂപ്പ് റോഡ് എന്നിവ വഴി തിരിച്ചുവിടും. 60 ദിവസത്തെ പ്രവൃത്തി കാലയളവില് കാലതാമസം ഒഴിവാക്കാന് വാഹനമോടിക്കുന്നവര് വഴിതിരിച്ചുവിടല് നിര്ദേശങ്ങള് പാലിക്കണമെന്ന് ട്രാഫിക് പോലീസ് അറിയിച്ചു.
SUMMARY: Race Course Road will be closed for 2 months from today for whitetopping works
