കൊച്ചി: ബലാത്സംഗക്കേസ് പ്രതിയായ രാഹുല്‍ മാങ്കൂട്ടത്തില്‍ എം.എല്‍.എയുമായി ബന്ധപ്പെട്ട വിഷയത്തില്‍ പ്രതികരിച്ചതിനെ തുടർന്ന് യുവനടി റിനി ആൻ ജോർജിന് വധഭീഷണി. എം.എല്‍.എയെ തൊട്ടാല്‍ കൊന്നുകളയുമെന്ന് ഭീഷണിപ്പെടുത്തി രണ്ടുപേർ വീടിന് മുന്നിലെത്തിയെന്നാണ് നടിയുടെ പരാതി. വീടിന്റെ ഗേറ്റ് തകർക്കാൻ ശ്രമമുണ്ടായെന്നും റിനി ആരോപിച്ചു.
സംഭവത്തില്‍ പോലീസില്‍ പരാതി നല്‍കിയിട്ടുണ്ട്. പറവൂരിലെ നടിയുടെ വീടിന് മുന്നില്‍ ഇന്നലെ രാത്രി 9 മണിക്ക് ശേഷമാണ് സംഭവങ്ങളുടെ തുടക്കം. ആദ്യം ഇരുചക്രവാഹനത്തില്‍ ഒരാള്‍ എത്തുകയും ഗേറ്റ് തകർത്ത് അകത്തേക്ക് കടക്കാൻ ശ്രമിക്കുകയും ചെയ്തു. വീട്ടുകാർ പുറത്തിറങ്ങിയതോടെ ഇയാള്‍ കടന്നുകളഞ്ഞു. പിന്നീട് രാത്രി 10 മണിയോടെ മറ്റൊരാള്‍ വീടിന് മുന്നിലേക്ക് എത്തുകയും വധഭീഷണി മുഴക്കുകയും അസഭ്യം പറയുകയും ചെയ്തു.
രാത്രിയായതിനാല്‍ അക്രമികളുടെ മുഖം വ്യക്തമായില്ലെന്ന് റിനി പറഞ്ഞു. നേരത്തെ സാമൂഹിക മാധ്യമങ്ങളിലൂടെയും അല്ലാതെയും ഇത്തരം ഭീഷണി സന്ദേശങ്ങള്‍ വന്നിരുന്നെങ്കിലും ഇത് കാര്യമാക്കിയിരുന്നില്ലെന്നും, എന്നാല്‍ കഴിഞ്ഞ ദിവസത്തെ സംഭവം ഭയപ്പെടുത്തുന്നതാണെന്നും റിനി വിശദീകരിച്ചു.
SUMMARY: Rini Ann George receives death threat, says she will be killed if she touches MLA
