ബെംഗളൂരു: കേരളത്തിന് പുറത്തുള്ള മലയാളി സമൂഹത്തിന്റെ സംസ്കാരവും പാരമ്പര്യവും സഹോദര്യബോധവും ജീവിതശൈലിയും നല്ല രീതിയിൽ നിലനിർത്തുന്നതിൽ മലയാളി സംഘടനകൾക്ക് നിർണായക പങ്കുണ്ടെന്ന് മുൻ ഐ.എസ്.ആർ.ഒ. ചെയർമാൻ ഡോ. എസ്. സോമനാഥ്. നായർ സേവാ സംഘ് കർണാടക സംഘടിപ്പിച്ച സാംസ്കാരിക-സാമൂഹിക സംഗമം ‘സ്നേഹസംഗമം 2026’ വസന്തനഗറിലെ ഡോ. ബി.ആർ. അംബേദ്കർ ഭവനിൽ ഉദ്ഘാടനംചെയ്തു സംസാരിക്കുകയായിരുന്നു അദ്ദേഹം.കേരളത്തിന്റെ തനതായ സംസ്കാരവും പാരമ്പര്യവും മൂല്യങ്ങളും കേരളത്തിന് പുറത്തും സംരക്ഷിക്കുകയും പുതുതലമുറയിലേക്ക് പകർന്നു നൽകുകയും ചെയ്യുന്നതിനായി മലയാളി സംഘടനകൾ കൂടുതൽ സജീവമായി പ്രവർത്തിക്കണം. പ്രത്യേകിച്ച് കേരളത്തിന് പുറത്തുള്ള മലയാളി സംഘടനകൾ സമൂഹത്തിലെ ഐക്യവും സൗഹൃദവും സഹോദര്യവും ശക്തിപ്പെടുത്തുന്നതിനുള്ള പ്രവർത്തനങ്ങൾക്ക് മുൻഗണന നൽകണമെന്നും അദ്ദേഹം പറഞ്ഞു.
ചെയർമാൻ ആർ. ഹരീഷ്കുമാർ അധ്യക്ഷനായി. കർണാടകയിലെ വിവിധ കരയോഗങ്ങളിൽനിന്നുള്ള നൂറുകണക്കിന് അംഗങ്ങളും അവരുടെ കുടുംബാംഗങ്ങളും പങ്കെടുത്തു.
തിരുവാതിര മത്സരവും വിവിധ കലാ-സാംസ്കാരിക പരിപാടികളും അരങ്ങേറി. ‘സിത്താനി ഭജൻസ്’ അവതരിപ്പിച്ച ഭജൻ സന്ധ്യയുമുണ്ടായി. ഉന്നത വിജയം കരസ്ഥമാക്കിയ വിദ്യാർഥികൾക്കുള്ള മെറിറ്റ് അവാർഡുകൾ വിതരണം ചെയ്തു. എസ്. ശിവപ്രസാദ്, ബിനോയ് എസ്. നായർ, പി.എം. ശശീന്ദ്രൻ, പി.കെ. മുരളീധരൻ, വിജയൻ തോന്നുർ, എൻ. വിജയകുമാർ, റെജികുമാർ, ബിജു പി. നായർ, പി. സുനിൽകുമാർ, ആർ. വിജയൻനായർ, പ്രസീദ് കുമാർ, പി. കൃഷ്ണകുമാർ, കെ.ബി. മുകുന്ദൻ എന്നിവർ നേതൃത്വം നൽകി.
