തൃശൂര്: സോഷ്യല് മീഡിയയിലൂടെയുള്ള വ്യക്തി അധിക്ഷേപത്തിനെതിരെ എഐസിസി സെക്രട്ടറി ടി.എന്.പ്രതാപന് തൃശൂര് റൂറല് എസ്പിക്ക് പരാതി നല്കി. ‘പാര്ട്ടി വിടാനൊരുങ്ങി ടി.എന്.പ്രതാപന്’ എന്ന തലക്കെട്ടോടെ തന്റെ ചിത്രം ചേര്ത്ത് സമൂഹമാധ്യമങ്ങളില് വ്യാപകമായി വ്യാജ പ്രചാരണം നടക്കുന്നുവെന്നാണ് പരാതിയില് പറയുന്നത്. ഇത്തരം പ്രചാരണങ്ങള് രാഷ്ട്രീയമായും വ്യക്തിപരമായും തനിക്കെതിരെ അപകീര്ത്തി സൃഷ്ടിക്കാനുള്ള ആസൂത്രിത നീക്കമാണെന്നും അദ്ദേഹം ആരോപിച്ചു.
ഇടതുപക്ഷത്തോട് ആഭിമുഖ്യം പുലര്ത്തുന്ന റെഡ് ആര്മി എന്ന ഫേസ്ബുക്ക് പേജില് അഭിലാഷ് അപ്പു അഭിലാഷ് എന്ന പേരിലുള്ള പ്രൊഫൈലിലാണ് ആദ്യമായി ഇക്കാര്യം പോസ്റ്റ് ചെയ്തതെന്ന് ടി.എന്.പ്രതാപന് പരാതിയില് ചൂണ്ടിക്കാട്ടി. അഭിലാഷ് അപ്പു അഭിലാഷ് എന്നയാളുടെ പോസ്റ്റാണ് പിന്നീട് വ്യാപകമായി ഷെയര് ചെയ്യപ്പെട്ടത്.
വ്യക്തിവിരോധം തീര്ക്കുന്നതിനും രാഷ്ട്രീയമായി ആക്രമിക്കുന്നതിനും പൊതുസമൂഹത്തില് അപകീര്ത്തിപ്പെടുത്തുന്നതിനും തന്റെ പാര്ട്ടി പ്രവര്ത്തകര്ക്കിടയില് തന്നോട് അവമതിപ്പും സ്പർദ്ദയും സൃഷ്ടിക്കുന്നതിനും കരുതികൂട്ടിയാണ് വ്യാജവാര്ത്ത ചമച്ച് കാര്ഡുകള് പോസ്റ്റ് ചെയ്തിട്ടുള്ളതെന്ന് പരാതിയില് പറയുന്നു.
പോസ്റ്ററിന്റെ സ്ക്രീന്ഷോര്ട്ട് സഹിതമാണ് പരാതി നല്കിയിരിക്കുന്നത്. സമൂഹമാധ്യമങ്ങളിലൂടെ പ്രചരിക്കുന്ന പോസ്റ്റുകള് പരിശോധിച്ച് അതിന് പിന്നിലുള്ളവരെ കണ്ടെത്തി കര്ശന നിയമനടപടി സ്വീകരിക്കണമെന്നാവശ്യപ്പെട്ടാണ് പരാതി നല്കിയിരിക്കുന്നത്. തെറ്റായ വിവരങ്ങള് പ്രചരിപ്പിച്ച് പ്രവര്ത്തകരിലും പൊതുജനങ്ങളിലും ആശയക്കുഴപ്പം സൃഷ്ടിക്കാനുള്ള ശ്രമമാണിതെന്നും ടി.എന്.പ്രതാപന് ചൂണ്ടിക്കാട്ടി.
SUMMARY: T.N. Prathapan files complaint with Thrissur Rural SP
