കണ്ണൂർ: വാണിയപ്പാറ ഇൻഫന്റ് ജീസസ് പള്ളിയിലെ കല്ലറയിൽ പായയിൽ പൊതിഞ്ഞ നിലയിൽ മറ്റൊരു വസ്തു കണ്ടെത്തി. നേരത്തെ സംസ്കരിച്ച മൃതദേഹത്തിന്റെ അവശിഷ്ടങ്ങൾക്കൊപ്പമാണ് പായയിൽ പൊതിഞ്ഞ നിലയിൽ മറ്റൊരു വസ്തു കണ്ടത്. ഇത് മൃതദേഹമാണെന്ന സംശയമുയർന്ന സാഹചര്യത്തിൽ കരിക്കോട്ടക്കരി പോലീസ് അന്വേഷണം ആരംഭിച്ചു.
കഴിഞ്ഞ വെള്ളിയാഴ്ച മറ്റൊരു മൃതദേഹം സംസ്കരിക്കുന്നതിനായി കല്ലറ തുറന്നപ്പോഴാണ് ഒരേ കല്ലറയ്ക്കുള്ളിൽ രണ്ട് മൃതദേഹങ്ങൾ കണ്ടെത്തിയത്. നാട്ടുകാരനായ ജിൽസ് ഉണ്ണിമാക്കൽ സോഷ്യൽ മീഡിയയിൽ പങ്കുവെച്ച കുറിപ്പിലൂടെയാണ് സംഭവം പുറംലോകമറിഞ്ഞത്. ദുരൂഹത തോന്നിയപ്പോളാണ് പോസ്റ്റിട്ടതെന്ന് ജിൽസ് പറഞ്ഞു.
പള്ളി അധികൃതർ തന്നെയാണ് പോലീസിനെ വിവരം അറിയിച്ചതെന്ന് വികാരി ഫാ. ജിൽബർട്ട് കൊന്നയിലും വ്യക്തമാക്കി. കല്ലറയ്ക്കുള്ളിൽ കണ്ടത് മൃതദേഹമാണെന്ന് സംശയമുണ്ടെന്നും ക്രിസ്ത്യൻ ആചാരപ്രകാരം ഇങ്ങനെയല്ല അടക്കം ചെയ്യാറുള്ളതെന്നും അദ്ദേഹം പറഞ്ഞു. ഇത് പോസ്റ്റ്മോർട്ടം ചെയ്ത മൃതദേഹമാണോ എന്നും സംശയമുണ്ട്. പോലീസിന്റെ അന്വേഷണത്തോട് പൂർണ്ണമായി സഹകരിക്കുമെന്നും പള്ളി വികാരി കൂട്ടിച്ചേർത്തു.
വീഡിയോ: മാതൃഭൂമി ന്യൂസ്
SUMMARY: Two bodies in one grave?; Police investigate grave at Infant Jesus Church in Vaniyappara, Kannur, raising mystery
