ഒറ്റപ്പാലം: വാടകവീട്ടില് യുവതി ദുരൂഹ സാഹചര്യത്തില് മരിച്ചനിലയില്. ഒറ്റപ്പാലത്താണ് സംഭവം. തെന്നടി ബസാർ വിവേകാനന്ദ റോഡിലെ വാടകവീട്ടിലാണ് സേലം സ്വദേശിനിയായ യുവതിയെ മരിച്ചനിലയില് കണ്ടെത്തിയത്. ആത്തൂർ പൊത്തനായകൻ പാളയം പുതുക്കോത്തംപടി സ്വദേശിനി കൃഷ്ണവേണി (25) ആണു മരിച്ചത്. സംഭവത്തിന് പിന്നാലെ യുവതിയുടെ ഭർത്താവ് മണികണ്ഠനെ പോലീസ് കസ്റ്റഡിയിലെടുത്തു.
ആത്തൂർ സ്വദേശിയാണ് മണികണ്ഠൻ. കഴിഞ്ഞദിവസം രാത്രി പത്തോടെയാണു യുവതിയെ മരിച്ചനിലയില് കണ്ടെത്തിയത്. 10 വർഷത്തോളമായി ഒറ്റപ്പാലത്തും പരിസരപ്രദേശങ്ങളിലുമായി വാടകയ്ക്കു താമസിക്കുന്ന കുടുംബമാണ്. ഭർത്താവ് ആത്തൂർ സ്വദേശി മണികണ്ഠൻ നിരന്തരം മദ്യപിച്ചെത്തി വീട്ടില് ബഹളമുണ്ടാക്കാറുള്ളതായി അയല്വാസികള് പോലീസിനോടു പറഞ്ഞു.
കഴിഞ്ഞദിവസം രാത്രി ഒമ്പതോടെ റൂമിലെ താമസക്കാരാണു കൃഷ്ണവേണിയെ മരിച്ചനിലയില് കണ്ടെത്തിയത്. തുടർന്നു പോലീസിനെ വിവരമറിയിക്കുകയായിരുന്നു. കൊലപാതകമാണെന്ന സംശയത്തെ തുടർന്നാണ് മണികണ്ഠനെ പോലീസ് കസ്റ്റഡിയിലെടുത്തത്. അസ്വാഭാവിക മരണത്തിനു കേസെടുത്ത ഒറ്റപ്പാലം പോലീസ് അന്വേഷണം തുടങ്ങി. കസ്റ്റഡിയിലുള്ള ഭർത്താവിനെ പോലീസ് ചോദ്യംചെയ്തു വരികയാണ്.
SUMMARY: Woman found dead under mysterious circumstances in rented house; husband in custody
