ബെംഗളൂരു: ഗതാഗത നിയമലംഘനം നടത്തിയതിന് അഞ്ച് മണിക്കൂറിനുള്ളിൽ 88 ലക്ഷം പിഴ ഈടാക്കി ബെംഗളൂരു ട്രാഫിക് പോലീസ്. ഗതാഗത നിയമലംഘനത്തിനെതിരെ നടന്ന സ്പെഷ്യൽ ഡ്രൈവിലാണിത്. വലിയ രാവിലെ 11 മുതൽ വൈകിട്ട് 4 വരെ നടത്തിയ ഡ്രൈവിൽ 1,757 കേസുകൾ രജിസ്റ്റർ ചെയ്യുകയും 88.6 ലക്ഷം രൂപ പിഴ ഈടാക്കുകയും ചെയ്തു.
തെറ്റായ ദിശയിലോ നോ എൻട്രി സ്ട്രെച്ചുകളിലോ വാഹനമോടിച്ച കേസുകളാണ് കൂടുതൽ കേസുകൾ (739) രജിസ്റ്റർ ചെയ്തത്. ഹെൽമറ്റ് ധരിക്കാതെ വാഹനമോടിച്ചതിന് 718 കേസുകൾ റിപ്പോർട്ട് ചെയ്തു. 3,395 വാഹനങ്ങൾ പരിശോധിച്ചതിൽ 24 ഡ്രൈവർമാരെ മദ്യപിച്ച് ഓടിക്കുന്നത് കണ്ടെത്തി. കൂടാതെ, അനുവദനീയമായതിലും കൂടുതൽ കുട്ടികളുമായി സ്കൂൾ ബസുകൾ ഓടിച്ചതിന് 327 കേസുകളും വേറെയും രജിസ്റ്റർ ചെയ്തിട്ടുണ്ട്. ഇതിൽ നിന്നും 65,400 രൂപ പിഴ ചുമത്തി.
ഈസ്റ്റ് ഡിവിഷൻ ട്രാഫിക് പോലീസ് നവംബർ 4 നും 7 നും ഇടയിൽ ഡെലിവറി ജീവനക്കാർ സാധാരണയായി ഉപയോഗിക്കുന്ന ഇ-ബൈക്കുകൾ കേന്ദ്രീകരിച്ച് പ്രത്യേക ഡ്രൈവ് നടത്തിയിരുന്നു. ഇതിൽ വൺവേ നിയന്ത്രണം ലംഘിച്ചതിന് 141 കേസുകളും ഫുട്പാത്തിൽ വാഹനം ഓടിച്ചതിന് 35 കേസുകളും രജിസ്റ്റർ ചെയ്തു.
TAGS: BENGALURU | TRAFFIC VIOLATION
SUMMARY: Traffic violation in Bengaluru: 1,757 cases booked, ₹88 lakh fine collected in 5 hours
