ബെംഗളൂരു: ബെംഗളൂരുവിൽ 108 ആംബുലൻസ് ജീവനക്കാരുടെ അനിശ്ചിതകാല പണിമുടക്ക് ആരംഭിച്ചു. തീർപ്പാക്കാത്ത കുടിശ്ശിക നൽകണമെന്നാവശ്യപ്പെട്ടാണ് ജിവികെ എമർജൻസി മാനേജ്‌മെൻ്റ് ആൻഡ് റിസർച്ച് ഇൻസ്റ്റിറ്റ്യൂട്ടിനു (ഇഎംആർഐ) കീഴിലുള്ള 108 ആംബുലൻസ് സർവീസിലെ ജീവനക്കാർ പണിമുടക്ക് നടത്തുന്നത്. ഇതോടെ നഗരത്തിലെ അടിയന്തിര സേവനങ്ങൾ തടസപ്പെട്ടേക്കും.
ജിവികെ ഇഎംആർഐയിൽ 2,500 ലധികം ആളുകൾ ജോലി ചെയ്യുന്നുണ്ട്. ഇവരുടെ ശമ്പളത്തിൻ്റെ പകുതി മാത്രമാണ് ഡിസംബർ, ജനുവരി മാസങ്ങളിൽ നൽകിയിട്ടുള്ളത്. കഴിഞ്ഞ മൂന്ന് മാസമായി ഇവർക്ക് ശമ്പളമേ നൽകുന്നില്ലെന്നാണ് ആരോപണം. കുടിശ്ശിക അനുവദിക്കുന്നത് സംബന്ധിച്ച് സർക്കാരിൽ നിന്ന് ഉറപ്പ് ലഭിച്ചില്ലെങ്കിൽ സമരം തുടരുമെന്ന് ആംബുലൻസ് സർവീസ് ജീവനക്കാർ മുന്നറിയിപ്പ് നൽകി.
