ബെംഗളൂരു: അന്നപൂർണേശ്വരി നഗറിൽ കോളേജ് വിദ്യാർത്ഥി പട്ടാപ്പകൽ കുത്തേറ്റ് മരിച്ചു. നാഗർഭാവി മഹേഷ് പിയു കോളേജിലെ ഒന്നാം വർഷ ബി.കോം വിദ്യാർത്ഥിയായ യോഗേഷ് (19) ആണ് കൊല്ലപ്പെട്ടത്. സംഭവത്തിൽ നാല് പേരെ പോലീസ് പിടികൂടി.
കഴിഞ്ഞ ദിവസം ഉച്ചയ്ക്കാണ് പട്ടാപ്പകൽ കൊലപാതകം അരങ്ങേറിയത്. കോളേജിൽ ക്ലാസിലിരിക്കുകയായിരുന്ന യോഗേഷിനെ അഞ്ചംഗ സംഘം പുറത്തേക്ക് വിളിച്ചിറക്കുകയായിരുന്നു. സംസാരിക്കുന്നതിനിടെ അക്രമികൾ ഒളിപ്പിച്ചു വെച്ചിരുന്ന മാരകായുധങ്ങളുമായി യോഗേഷിനെ ആക്രമിച്ചു. ക്രൂരമായ ആക്രമണത്തിന് ശേഷം പ്രതികൾ സംഭവസ്ഥലത്തുനിന്ന് ഓടി രക്ഷപ്പെട്ടു. പട്ടാപ്പകൽ കോളേജ് പരിസരത്തുണ്ടായ ഈ കൊലപാതകം വിദ്യാർഥികൾക്കിടയിലും നാട്ടുകാർക്കിടയിലും വലിയ ആശങ്കയാണ് സൃഷ്ടിച്ചിരിക്കുന്നത്.
കോളേജിലെ സീനിയർ വിദ്യാർഥിനിയെച്ചൊല്ലിയുണ്ടായ തർക്കമാണ് കൊലപാതകത്തിലേക്ക് നയിച്ചതെന്നാണ് പോലീസിന്റെ പ്രാഥമിക കണ്ടെത്തൽ. കൊല്ലപ്പെട്ട യോഗേഷും കേസിലെ പ്രധാന പ്രതിയെന്ന് സംശയിക്കുന്ന ഭുവനേഷും ഒരേ കോളേജിലെ വിദ്യാർഥികളായിരുന്നു.
സീനിയർ വിദ്യാർഥിനിയോട് ഭുവനേഷ് പ്രണയാഭ്യർത്ഥന നടത്തിയെങ്കിലും പെൺകുട്ടി നിരസിച്ചതിനെ തുടർന്ന് യോഗേഷ് പെൺകുട്ടിയെക്കുറിച്ച് അപവാദം പ്രചരിപ്പിക്കുന്നുവെന്ന് ഭുവനേഷ് പ്രചരിപ്പിച്ചതായാണ് പോലീസ് പറയുന്നത്.
തുടർന്ന് പെൺകുട്ടിയുമായി അടുത്ത ബന്ധമുണ്ടായിരുന്ന, കോളേജിൽ നിന്ന് പുറത്താക്കപ്പെട്ട പ്രായപൂർത്തിയാകാത്ത വിദ്യാർഥിയെ ഭുവനേഷ് പ്രകോപിപ്പിച്ചതായും അന്വേഷണത്തിൽ വ്യക്തമായതായി പോലീസ് അറിയിച്ചു. ഇയാൾ മൂന്ന് സുഹൃത്തുക്കളോടൊപ്പം എത്തി യോഗേഷിനെ കോളേജിൽ നിന്ന് വിളിച്ചിറക്കി കുത്തുകയായിരുന്നുവെന്നാണ് വിവരം.
ഗുരുതരമായി പരുക്കേറ്റ യോഗേഷിനെ സുഹൃത്തുക്കളും നാട്ടുകാരും ചേർന്ന് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. കൊലപാതകത്തിന് പിന്നാലെ പ്രതികൾ സ്ഥലത്തുനിന്ന് രക്ഷപ്പെട്ടു. ഇതിൽ നാല് പേരെയാണ് പോലീസ് പിടികൂടിയത്. പിടിയിലായവരിൽ മൂന്ന് പേർ പ്രായപൂർത്തിയാകാത്തവരാണ്. ഒളിവിലുള്ള ഭുവനേഷിനായി പോലീസ് തിരച്ചിൽ ശക്തമാക്കി.
SUMMARY: College student stabbed to death in Bengaluru; four arrested.
