ബെംഗളൂരു: നഗരത്തിലെ നയന്തഹള്ളി വിനായക ലേഔട്ടിൽ എൽ.പി.ജി സിലിണ്ടർ പൊട്ടിത്തെറിച്ച് ഒരു കുടുംബത്തിലെ ആറ് പേർക്ക് പരുക്കേറ്റു. കൂലിതൊഴിലാളിയായ കരിലിംഗപ്പ (40), ഭാര്യ ലക്ഷ്മമ്മ (43), മക്കളായ ചൈത്ര (11), ബസവ (9), ഗീത, ഗിരിജ (3) എന്നിവര്‍ക്കാണ് പരുക്കേറ്റത്. ഇന്ന് പുലർച്ചെ ഏകദേശം 6.20ഓടെയാണ് സംഭവം നടന്നത്.
റയചൂർ സ്വദേശികളായ കുടുംബം നയന്തഹള്ളിയിലെ വാടകവീട്ടിലായിരുന്നു താമസിച്ചിരുന്നത്. പരുക്കേറ്റവരെ ഉടൻ വിക്ടോറിയ ആശുപത്രിയിലെ പൊള്ളലേറ്റവർക്കുള്ള ചികിത്സാ വിഭാഗത്തിൽ പ്രവേശിപ്പിച്ചു.
പരുക്കേറ്റവരിൽ നാല് കുട്ടികളുടെ നില ഗുരുതരമാണ്. സംഭവത്തിന് പിന്നാലെ സമീപവാസികളും മറ്റുള്ളവരും ചേർന്ന് രക്ഷാപ്രവർത്തനം നടത്തി പരുക്കേറ്റവരെ ആശുപത്രിയിലെത്തിക്കുകയായിരുന്നു. സിലിണ്ടറിൽ നിന്നുണ്ടായ വാതക ചോർച്ചയെ തുടർന്നാണോ പൊട്ടിത്തെറിയുണ്ടായതെന്ന് ഉൾപ്പെടെയുള്ള കാരണങ്ങൾ അധികൃതർ പരിശോധിച്ചുവരികയാണ്. സംഭവസ്ഥലത്തെ സാഹചര്യങ്ങളും വീട്ടിലെ ഗ്യാസ് സംവിധാനവും പരിശോധിച്ച ശേഷമേ അപകടത്തിന്റെ കൃത്യമായ കാരണം വ്യക്തമാകൂ.
SUMMARY: Cylinder explosion in Nayandahalli; six members of a family injured.
