ബെംഗളൂരു: ബെംഗളൂരു – തുമകുരു ദേശീയ പാതയിൽ ഒമ്നി വാനും കാറും കൂട്ടിയിടിച്ച് ഒരു മരണം. ഞായറാഴ്ച രാത്രിയോടെയാണ് സംഭവം. ഇടിയുടെ ആഘാതത്തിൽ ഒമ്നി വാൻ കത്തിനശിച്ചു. ഇതിൽ കുടുംബത്തോടൊപ്പം സഞ്ചരിച്ച ദിവ്യയാണ് (16) മരിച്ചത്.
മാധവാര ബെംഗളൂരു ഇൻ്റർനാഷണൽ എക്സിബിഷൻ സെൻ്ററിന് (ബിഐഇസി) സമീപം രാത്രി 10 മണിയോടെ അതിവേഗത്തിൽ വന്ന മാരുതി സുസുക്കി ബലേനോ കാർ ഒമ്നി വാനിന്റെ പിന്നിൽ ഇടിച്ചു. അപകടത്തെ തുടർന്ന് പെട്രോൾ ചോർച്ചയുണ്ടാകുകയും ഒമ്നി വാനിന് തീപിടിക്കുകയുമായിരുന്നു.
പൊള്ളലേറ്റ ദിവ്യ സംഭവസ്ഥലത്ത് തന്നെ മരിച്ചു. വാനിലുണ്ടായിരുന്ന ശാന്തിലാൽ (65), മഞ്ജുള (65), മഹേഷ് (46), തരുൺ (43), സുനിത (39), നമൻ (20), മായങ്ക് (19), ബലേനോ കാർ ഡ്രൈവർ എന്നിവർക്ക് പരുക്കേറ്റു. ഇവരെ സമീപത്തെ ആശുപത്രിയിൽ പ്രവേശിപ്പിച്ചു. ഇവരിൽ മൂന്ന് പേരുടെ നില ഗുരുതരമാണ്. സംഭവത്തിൽ നെലമംഗല ട്രാഫിക് പോലീസ് കേസെടുത്തു.
The post ഒമ്നി വാനും കാറും കൂട്ടിയിടിച്ച് ഒരു മരണം; ഒമ്പത് പേർക്ക് പരുക്ക് appeared first on News Bengaluru.
