ബെംഗളൂരു: ദീപാവലി ആഘോഷത്തിനിടെ ബെംഗളൂരുവിൽ വായു നിലവാരം ക്രമാതീതമായി കുറഞ്ഞു. ആഘോഷത്തിന്റെ ഭാഗമായി നഗരത്തിൽ വ്യാപകമായി പടക്കം പൊട്ടിച്ചതോടെയാണിതെന്ന് ബിബിഎംപി ചീഫ് കമ്മീഷണർ തുഷാർ ഗിരിനാഥ് പറഞ്ഞു. വായുമലിനീകരണത്തിന്റെ അളവ് വെളിപ്പെടുത്തുന്ന എയർ ക്വാളിറ്റി ഇൻഡക്സ് (എക്യൂഐ) നഗരത്തിലെ പല സ്ഥലങ്ങളിലും വളരെ കൂടുതലാണ്. മജസ്റ്റിക് റെയിൽവേ സ്റ്റേഷൻ പരിസരത്താണ് കഴിഞ്ഞ രണ്ട് ദിവസത്തിനിടെ ഏറ്റവും ഉയർന്ന എക്യൂഐ രേഖപ്പെടുത്തിയത്.
ഒക്ടോബർ 24-ന് 78 ആയിരുന്നു പ്രദേശത്തെ എക്യൂഐ. 31-ന് 150-ലെത്തി. ജിഗനിയാണ് തൊട്ടുപിറകിലുള്ളാട്ജ്. 53-ൽ നിന്ന് 148 ആയാണ് എക്യുഐ ഉയർന്നത്. ബി.ടി.എം. ലേ ഔട്ടിൽ 48-ൽ നിന്ന് 143-ലേക്കും ശിവപുരയിൽ 58-ൽനിന്ന് 128 ആയും ഉയർന്നു. എല്ലാ വർഷവും ദീപാവലി ആഘോഷസമയം നഗരത്തിൽ വായുമലിനീകരണം വർധിക്കാറുണ്ട്. എന്നാൽ ഇത്തവണ ഇത് വളരെ കൂടുതലാണെന്ന് ബിബിഎംപി ചീഫ് കമ്മീഷണർ അഭിപ്രായപെട്ടു.
ഇതൊഴിവാക്കാൻ ഇത്തവണ പടക്കം പൊട്ടിക്കുന്നത് രാത്രി എട്ടുമുതൽ പത്തുവരെയാക്കി നിയന്ത്രണമേർപ്പെടുത്തിയിരുന്നു. കൂടാതെ വായുമലിനീകരണം കുറയ്ക്കാൻ ഇത്തവണ ഹരിത പടക്കങ്ങൾ മാത്രമേ ഉപയോഗിക്കാവു എന്ന് കർശന നിർദേശവും ഉണ്ടായിരുന്നു. എന്നാൽ, ഇത് പലയിടത്തും നടപ്പായില്ല. ഇതാണ് എക്യുഐ വർധിക്കാൻ കാരണമായത്.
TAGS: BENGALURU | AIR QUALITY
SUMMARY: Air quality dips in Bengaluru on Deepavali
