ഇടുക്കി: കയ്യേറ്റം ഒഴിപ്പിച്ചതിന് സ്‌പെഷ്യല്‍ തഹസില്‍ദാരെ ദേവികുളം എംഎല്‍എ അഡ്വ. എ രാജ ഭീഷണിപ്പെടുത്തുന്ന ഓഡിയോ പുറത്ത്. സ്‌പെഷ്യല്‍ തഹസില്‍ദാർ സി വി ഗായത്രിയെയാണ് എംഎല്‍എ ഭീഷണിപ്പെടുത്തിയത്. ഉദ്യോഗസ്ഥർ മര്യാദയ്ക്ക് നിന്നില്ലെങ്കില്‍ അവരുടെ കയ്യും കാലും തല്ലിയൊടിക്കുമെന്നായിരുന്നു ഭീഷണി.
പുറമ്പോക്ക് ഭൂമിയിലെ സ്ഥലം ഒഴിപ്പിക്കുന്നതുമായി ബന്ധപ്പെട്ടാണ് എംഎല്‍എ ഇടപെട്ടത്. സർക്കാരിന്റെ പുറമ്പോക്ക് ഭൂമി കയ്യേറി നടത്തുന്ന നിർമാണങ്ങള്‍ക്ക് ഉദ്യോഗസ്ഥർ നേരത്തെ സ്റ്റോപ്പ് മെമ്മോ നല്‍കിയിരുന്നു. എന്നാല്‍ ഉത്തരവ് ലംഘിച്ച്‌ അവധി ദിവസങ്ങളില്‍പ്പോലും നിർമാണം തുടർന്നു.
പിന്നാലെ നിർമാണങ്ങള്‍ പൊളിച്ചുനീക്കുമെന്ന് ഉദ്യോഗസ്ഥർ മുന്നറിയിപ്പ് നല്‍കി. ഇതിനെതിരെയാണ് രാജ രംഗത്തെത്തിയത്. ബുള്‍ഡോസർ ഉപയോഗിച്ച്‌ കെട്ടിടം ഇടിച്ചുതകർക്കുമെന്ന് കൈക്കൂലി വാങ്ങി ഉദ്യോഗസ്ഥർ സാധാരണക്കാരെ ഭീഷണിപ്പെടുത്തിയ സാഹചര്യത്തിലാണ് പ്രകോപിതനായി സംസാരിക്കേണ്ടി വന്നതെന്നാണ് എംഎല്‍എയുടെ വാദം.
SUMMARY: Audio of Devikulam MLA A Raja’s threat released
