ബെംഗളൂരു: കേരളത്തിലെ നിയമസഭാ തെരഞ്ഞെടുപ്പിനോടനുബന്ധിച്ച് പാലക്കാട് ഡിവിഷനിലെ റെയിൽവേ സംരക്ഷണ സേന മംഗളൂരു ജംഗ്ഷൻ റെയിൽവേ സ്റ്റേഷനിൽ നടത്തിയ പ്രത്യേക പരിശോധനയിൽ 201 പഴയ ഉപയോഗിച്ച മൊബൈൽ ഫോണുകൾ പിടികൂടി.
ഏകദേശം 10.05 ലക്ഷം രൂപ വിലമതിക്കുന്നതാണ് പിടിച്ചെടുത്ത ഫോണുകൾ. ജാംനഗർ-തിരുനെൽവേലി എക്സ്പ്രസിലെ ജനറൽ കോച്ചിൽ ഉപേക്ഷിച്ച നിലയിലായിരുന്നു ഇവ സൂക്ഷിച്ച ബാഗുകൾ. ലഗേജ് റാക്കിൽ സൂക്ഷിച്ച മൂന്ന് ബാഗുകളിൽ നിന്നാണ് വിവിധ ബ്രാൻഡുകളുടെ ഫോണുകൾ കണ്ടെത്തിയത്. പിടിച്ചെടുത്ത ഫോണുകൾ തുടർ അന്വേഷണത്തിനായി ഗവൺമെന്റ് റെയിൽവേ പോലീസിന് (GRP) കൈമാറിയിട്ടുണ്ട്. തെരഞ്ഞെടുപ്പ് കാലയളവിൽ ട്രെയിനുകൾ വഴി നിരോധിത വസ്തുക്കളോ അനധികൃത പണമോ കടത്തുന്നത് തടയാൻ റെയിൽവേ സ്റ്റേഷനുകളിലും ട്രെയിനുകളിലും കർശന നിരീക്ഷണം തുടരുമെന്ന് റെയിൽവേ അധികൃതർ അറിയിച്ചു.
SUMMARY : RPF inspection; Old mobile phones worth Rs 10 lakh seized
