ബെംഗളൂരു: ബെംഗളൂരു മെട്രോയിലെ യാത്രാ ദുരിതത്തിന് പരിഹാരമായി കൂടുതൽ ട്രെയിനുകൾക്ക് അനുമതി നൽകി റെയിൽവേ ബോർഡ്. പർപ്പിൾ, ഗ്രീൻ പാതകളിലാണ് ട്രെയിനുകൾക്ക് താത്കാലികാനുമതി ലഭിച്ചിരിക്കുന്നത്. പർപ്പിൾ, ഗ്രീൻ ലൈനുകള്ക്ക് ആകെ 21 ട്രെയിനുകളാണ് ലഭിക്കുക. ചൈനീസ് കമ്പനിയായ സി.ആർ.ആർ.സി. നാൻജിങ് പുഷെൻ പശ്ചിമ ബംഗാൾ ആസ്ഥാനമായുള്ള ടിറ്റാഗർ റെയിൽ സിസ്റ്റംസുമായി ചേർന്നാണ് ഈ ട്രെയിനുകൾ നിർമിച്ചു നൽകുന്നത്. .
ഫുള്ളി ഇൻഫ്ലേറ്റഡ് മോഡിൽ പരമാവധി വേഗം മണിക്കൂറിൽ 80 കിലോമീറ്ററും സെക്കൻഡറി എയർ സ്പ്രിങ്ങിന്റെ ഡിഫ്ലേറ്റഡ് മോഡിൽ 25 കിലോമീറ്ററും വേഗം ഉൾപ്പെടെയുള്ള നിബന്ധനകളോടെയാണ് അനുമതി നല്കുക. പർപ്പിൾ, ഗ്രീൻ ലൈനുകൾക്കായുള്ള ഡയറക്ട് ടു ഗോ (ഡി.ടി.ജി) സിഗ്നലിങ്ങുമായും ട്രെയിൻ നിയന്ത്രണ സംവിധാനവുമായും ട്രെയിനുകളുടെ സംയോജനം, പ്രവർത്തനം എന്നിവ സ്ഥിരീകരിക്കുന്ന സ്വതന്ത്ര സുരക്ഷ വിലയിരുത്തൽ (ഐ.എസ്.എ) റിപ്പോർട്ട് മെട്രോ റെയിൽ സുരക്ഷ കമീഷണര്ക്ക് സമര്പ്പിക്കുകയും പ്രത്യേക അനുമതി നേടുകയും വേണം.
സർവിസ് ആരംഭിക്കുന്നതിന് മുമ്പ് ട്രെയിനുകൾ 37 നിയമപരമായ പരിശോധനകള് പൂര്ത്തിയാക്കണമെന്നുണ്ട്. ട്രെയിനുകളുടെ ഓസിലേഷൻ, ബ്രേക്കിങ്, വേഗം, സിസ്റ്റം ഇന്റഗ്രേഷൻ പരിശോധനകൾ എന്നിവയുമായി ബന്ധപ്പെട്ട സ്റ്റാറ്റ്യൂട്ടറി ട്രയലുകൾ നടത്തുന്നതിനായി ബി.എം.ആർ.സി.എൽ റെയിൽവേ മന്ത്രാലയത്തിന് കീഴിലുള്ള റിസർച് ഡിസൈൻസ് ആൻഡ് സ്റ്റാൻഡേഡ്സ് ഓർഗനൈസേഷനെ (ആർ.ഡി.എസ്.ഒ) സമീപിച്ചിരുന്നു. ഐ.എസ്.എ സർട്ടിഫിക്കറ്റ് ലഭിച്ചതിന് ശേഷം സി.എം.ആർ.എസ്. അന്തിമ അനുമതി നൽകും. മേയ്-ജൂൺ മാസത്തോടെ അന്തിമ അനുമതി ലഭിച്ചേക്കുമെന്നും ശേഷം ട്രെയിനുകൾക്ക് സര്വിസ് ആരംഭിക്കാന് സാധിക്കുമെന്ന് പ്രതീക്ഷിക്കുന്നതായും ബി.എം.ആർ.സി.എൽ ഉദ്യോഗസ്ഥര് പറഞ്ഞു.
SUMMARY: Namma Metro approves new trains on Purple-Green line
