ബെംഗളൂരു: വീട്ടില്‍ ഇലക്ട്രിക് സ്കൂട്ടർ ചാർജ് ചെയ്യുന്നതിനിടെ പൊട്ടിത്തെറിച്ചുണ്ടായ അപകടത്തില്‍ ഗൃഹനാഥൻ മരിച്ചു. ബെംഗളൂരു അള്‍സൂരു മർഫി ടൗണിലാണ് സംഭവം. ഓട്ടോ ഡ്രൈവറായ ലൂർഡ് നാഥൻ (65) ആണ് മരിച്ചത്. മെയ് 11 ന് രാത്രി 11ഓടെ, ഇലക്ട്രിക് സ്കൂട്ടർ ചാർജ് ചെയ്യാൻ വച്ചിരുന്നു. തുടർന്ന് കുടുംബാംഗങ്ങൾ ഉറങ്ങി. മകന്‍ ഫ്രാങ്ക് ആന്റണിയും ഭാര്യയും ഒന്നാം നിലയിയിരുന്നു, ലൂർഡ് താഴത്തെ നിലയിലും ഒരു ചെറിയ മുറിയിലാണ് ഉറങ്ങിയത്. പുലർച്ചെ മൂന്നോടെ, വാഹനം വീടിനുള്ളിൽ പൊട്ടിത്തെറിക്കുകയും വീടിന് തീപിടിക്കുകയുമായിരുന്നു. സ്ഫോടന ശബ്ദം കേട്ട് ആന്റണിയും ഭാര്യയും താഴെ എത്തി തീ അണച്ചുവെങ്കിലും ലൂർഡ് നാഥന് ഗുരുതരമായി പൊള്ളലേറ്റു. ഇദ്ദേഹത്തെ ഉടൻ തന്നെ ബൗറിംഗ് ആൻഡ് ലേഡി കഴ്‌സൺ ആശുപത്രിയിൽ പ്രവേശിപ്പിച്ചുവെങ്കിലും മരണം സംഭവിച്ചു.
വീടിനകത്തെ സോഫ, ടെലിവിഷൻ, പ്ലാസ്റ്റിക് കസേരകൾ തുടങ്ങിയ വീട്ടുപകരണങ്ങൾ കത്തി നശിച്ചു. ഫ്രാങ്ക് ആന്‍റണി നൽകിയ പരാതിയുടെ അടിസ്ഥാനത്തിൽ, 2023 ലെ ബിഎൻഎസ്എസ് സെക്ഷൻ 194 പ്രകാരം കേസ് രജിസ്റ്റർ ചെയ്തിട്ടുണ്ട്. സ്ഫോടനത്തിന്‍റെ കാരണം കണ്ടെത്താൻ പോലീസ് അന്വേഷണം ആരംഭിച്ചു.
SUMMARY: Elderly man dies after electric scooter explodes while charging; incident in Bengaluru
