കൊച്ചി: മലയാള സിനിമയിലെ താരസംഘടനയായ അമ്മയില് ഉടലെടുത്ത തർക്കങ്ങള്ക്ക് പിന്നാലെ നടി ശ്വേത മേനോൻ പ്രസിഡന്റായ ഭരണസമിതി രാജിവച്ചു. വാർഷിക ജനറല് ബോഡി യോഗത്തിലെ തർക്കങ്ങള്ക്ക് പിന്നാലെയാണ് നാടകീയമായ രാജി. ചുമതലയേറ്റെടുത്ത് ഒരു വർഷം പോലും തികയ്ക്കാതെയാണ് രാജി. അതേസമയം പ്രസിഡന്റ് ശ്വേതാ മേനോൻ, ജനറല് സെക്രട്ടറി കുക്കു പരമേശ്വരൻ എന്നിവരുള്പ്പെടെയുള്ള 17 അംഗ ഭരണസമിതി കൂട്ടത്തോടെ രാജിവെച്ചു.
വാർഷിക ജനറല് ബോഡി യോഗത്തില് ഭരണസമിതി അവതരിപ്പിച്ച പ്രവർത്തന റിപ്പോർട്ട് ഭൂരിപക്ഷം അംഗങ്ങളും തള്ളിയതിനെ തുടർന്നാണ് നാടകീയ നീക്കങ്ങള്ക്കൊടുവില് കൂട്ടരാജി. റിപ്പോർട്ടിന്മേല് യോഗത്തില് കടുത്ത വിമർശനമുയരുകയും അംഗീകാരം ലഭിക്കാതെ വരികയും ചെയ്തതോടെ, പദവികളില് തുടരുന്നത് ഉചിതമല്ലെന്ന നിലപാടിലേക്ക് ഭരണസമിതി എത്തുകയായിരുന്നു.
ഇനി സംഘടനയുടെ ചുമതല വീണ്ടും അഡ്ഹോക് കമ്മിറ്റിയുടെ കൈകളിലേക്കെത്തും. നിലവിലെ ഭരണസമിതിക്കെതിരെ അമ്മയിലെ അംഗങ്ങളില് ഭൂരിപക്ഷം പേരും അവിശ്വാസം രേഖപ്പെടുത്തിയിരുന്നു. ഇതോടെയാണ് രാജിയുടെ വക്കിലേക്ക് കാര്യങ്ങള് എത്തിയത്. ഭരണസമിതി അവതരിപ്പിച്ച വാർഷിക റിപ്പോർട്ടിലും തർക്കങ്ങള് ഉയർന്നിരുന്നു. ഭരണസമിതിക്കെതിരെ ഒരു വിഭാഗം അവിശ്വാസ പ്രമേയ രേഖ തയ്യാറാക്കിയെന്ന റിപ്പോർട്ടും പുറത്തുവന്നിരുന്നു. നേതൃത്വം സംഘടനയ്ക്ക് അവമതിപ്പുണ്ടാക്കിയെന്നാണ് ആരോപണം.
ഹേമ കമ്മിറ്റി റിപ്പോർട്ട് പുറത്തുവന്നതിന് പിന്നാലെ മുൻ പ്രസിഡന്റ് മോഹൻലാലിന്റെ നേതൃത്വത്തിലുള്ള സമിതി രാജിവെച്ചപ്പോഴാണ് ‘അമ്മ’യുടെ ചരിത്രത്തിലാദ്യമായി വനിതാ നേതൃത്വത്തിലുള്ള പുതിയ ഭരണസമിതി അധികാരമേറ്റത്. എന്നാല്, ഒരു വർഷത്തെ കാലാവധി പോലും പൂർത്തിയാക്കാൻ സാധിക്കാതെ പുതിയ സമിതിക്കും പടിയിറങ്ങേണ്ടി വന്നത് സംഘടനയെ വീണ്ടും കടുത്ത പ്രതിസന്ധിയിലേക്കാണ് തള്ളിവിട്ടിരിക്കുന്നത്.
SUMMARY: AMMA Governing Council resigns; all members submit resignations
