ബെംഗളൂരു: നഗരത്തിലെ വിവിധ വൈദ്യുതി വിതരണ ശൃംഖലകളിൽ അറ്റകുറ്റപ്പണികളും പരിപാലന പ്രവർത്തനങ്ങളും നടക്കുന്നതിനാൽ ജൂലൈ 18, 19 തീയതികളിൽ ബെംഗളൂരുവിലെ 100-ലധികം പ്രദേശങ്ങളിൽ വൈദ്യുതി വിതരണം തടസ്സപ്പെടുമെന്ന് ബെംഗളൂരു വൈദ്യുതി വിതരണ കമ്പനി (ബെസ്കോം) അറിയിച്ചു. വിവിധ ഉപകേന്ദ്രങ്ങളുമായി ബന്ധിപ്പിച്ച ലൈനുകളിലും ട്രാൻസ്ഫോർമറുകളിലും നടക്കുന്ന അറ്റകുറ്റപ്പണികളുടെ ഭാഗമായാണ് ഈ ക്രമീകരണം.
അറ്റകുറ്റപ്പണികൾ പൂർത്തിയാകുന്ന സമയത്തിനനുസരിച്ച് പ്രദേശങ്ങൾ തിരിച്ചാണ് വൈദ്യുതി വിതരണം നിർത്തിവയ്ക്കുക. മിക്കയിടങ്ങളിലും രാവിലെ 10 മണിയോടെയാണ് വൈദ്യുതി മുടങ്ങിത്തുടങ്ങുക. വൈകുന്നേരം 4 മുതൽ 5 മണിവരെയുള്ള സമയത്തിനുള്ളിൽ വിതരണം പുനഃസ്ഥാപിക്കാനാണ് ലക്ഷ്യമിടുന്നതെങ്കിലും, സാങ്കേതിക പ്രവർത്തനങ്ങളുടെ പുരോഗതി അനുസരിച്ച് സമയത്തിൽ ചെറിയ മാറ്റങ്ങൾ ഉണ്ടായേക്കാമെന്ന് ബെസ്കോം അറിയിച്ചു.
വൈദ്യുതി മുടക്കം ബാധിക്കുന്ന പ്രധാന പ്രദേശങ്ങളിൽ കെ.ആർ. പുരം മെയിൻ റോഡ്, ഇന്ദിരാനഗർ, എച്ച്.എ.എൽ. രണ്ടാം ഘട്ടം, ഡോംലൂർ, ജയനഗർ നാലാം ബ്ലോക്ക്, ജെ.പി. നഗർ, ബി.ടി.എം. ലേഔട്ട്, രാജാജിനഗർ, വിജയനഗർ, ബസവേശ്വരനഗർ, ഹെബ്ബാൾ, താനിസന്ദ്ര, സഹകാര നഗർ എന്നിവ ഉൾപ്പെടുന്നു. ഇതുകൂടാതെ ഈ ഉപകേന്ദ്രങ്ങളുടെ പരിധിയിലുള്ള നിരവധി ലേഔട്ടുകളിലും തെരുവുകളിലും വൈദ്യുതി വിതരണം താൽക്കാലികമായി തടസ്സപ്പെടും. ആകെ 100-ലധികം പ്രദേശങ്ങളെയാണ് ഈ അറ്റകുറ്റപ്പണികൾ ബാധിക്കുക.
ജയ് ഭുവനേശ്വരി ലേഔട്ട്, കെആർ പുരം മെയിൻ റോഡ്, ദീപ ആശുപത്രി പരിസരം, വിനായക ലേഔട്ട്, അജിത് ലേഔട്ട്, ടിസി പാല്യ സിഗ്നൽ, ഭട്ടരഹള്ളി, ചിക്കബസവനപുര, SEA കോളേജ് ഏരിയ, ആൽഫ ഗാർഡൻ, സ്വതന്ത്ര നഗർ, രാജരാജേശ്വരി ലേഔട്ട്, മുനേശ്വര് ലേഔട്ട്, ആൽഫ ഗാർഡൻ ലേഔട്ട്, കോക്കനട്ട് ഗാര്ഡന്, ബഥേൽ നഗർ, ബൃന്ദാവൻ ലേഔട്ട്, കെആർആർ ലേഔട്ട്, കേംബ്രിഡ്ജ് ലേഔട്ട്, കേംബ്രിഡ്ജ് ഗാർഡൻ ലേഔട്ടും സമീപ പ്രദേശങ്ങളിലും ഇന്ന് രാവിലെ 10 മുതൽ വൈകുന്നേരം 5 വരെ വൈദ്യതി മുടങ്ങും.
എയർപോർട്ട് റോഡ് കൊടിഹള്ളി, എച്ച്എഎൽ രണ്ടും മൂന്നും ഫെയ്സുകള്, ഡോംലൂർ സെക്കന്ഡ് ഫെയിസ്, ഓള്ഡ്, ന്യൂ തിപ്പസാന്ദ്ര, എംജി റോഡ്, ചർച്ച് സ്ട്രീറ്റ്, സെന്റ് മാർക്ക്സ് റോഡ്, ലാവെൽ റോഡ്, മ്യൂസിയം റോഡ്, റിച്ച്മണ്ട് റോഡ്, കസ്തൂർബ റോഡ്, റെസിഡൻസി റോഡ്, ട്രിനിറ്റി സർക്കിൾ, അശോക് നഗർ, മർഫി ടൗൺ, ഹലസുരു, ഡിഫൻസ് കോളനി, ഐഎസ്ആർഒ ക്വാർട്ടേഴ്സ്, ഇഎസ്ഐ ഹോസ്പിറ്റൽ, ടെലിഫോൺ എക്സ്ചേഞ്ച് ഏരിയ, കാൾട്ടൺ ടവേഴ്സ്, എൻഎഎൽ കോമ്പൗണ്ട്, അപ്പാറെഡ്ഡി പാളയ, മോട്ടപ്പനപാളയ, കൊടിഹള്ളി പരിസര പ്രദേശങ്ങള് എന്നിവിടങ്ങളില് നാളെ രാവിലെ 10 മുതൽ വൈകുന്നേരം 4.30 വരെ വൈദ്യതി മുടങ്ങും.
പീനിയ ഡിവിഷന് കീഴിലെ പീനിയ വില്ലേജ്, എസ്ആർഎസ് റോഡ്, പീനിയ 1, 2, 3, 4 ബ്ലോക്കുകൾ, എംഇഐ ഫാക്ടറി ഏരിയ, ഭാരത് കണ്ടക്ടർ റോഡ്, മലിനീകരണ നിയന്ത്രണ ബോർഡ് റോഡ്, ബ്രെമ്മൽ റബ്ബർ റോഡ്, പിഐഎ ക്രോസ് റോഡുകൾ, പീനിയ അജാക്സ് റോഡ്, ജനറൽ മെറ്റൽ സർക്കിൾ, സ്നോ വൈറ്റ് റോഡ്, മൈസൂർ എഞ്ചിനീയറിംഗ് റോഡ്, സൺറൈസ് കാസ്റ്റിംഗ് റോഡ്, വൈഷ്ണവി മാൾ, കാവേരി മാൾ എന്നിവിടങ്ങളിലും നാളെ രാവിലെ 10 മുതൽ ഉച്ചയ്ക്ക് 2 വരെ വൈദ്യതി മുടങ്ങും.
അറ്റകുറ്റപ്പണികൾ നടക്കുന്ന സമയത്ത് ഗാർഹിക ഉപഭോക്താക്കൾ, വ്യാപാര സ്ഥാപനങ്ങൾ, ചെറുകിട വ്യവസായങ്ങൾ, ഓഫീസുകൾ എന്നിവയ്ക്ക് താൽക്കാലിക ബുദ്ധിമുട്ട് നേരിടാൻ സാധ്യതയുണ്ട്. അതിനാൽ വൈദ്യുതി ആവശ്യമായ ജോലികൾ മുൻകൂട്ടി പൂർത്തിയാക്കാനും കമ്പ്യൂട്ടറുകൾ, ഇൻവെർട്ടറുകൾ, മറ്റ് ഇലക്ട്രോണിക് ഉപകരണങ്ങൾ എന്നിവയ്ക്ക് ആവശ്യമായ മുൻകരുതലുകൾ സ്വീകരിക്കാനും ബെസ്കോം നിർദേശിച്ചിട്ടുണ്ട്. ആശുപത്രികൾ, ഡാറ്റാ സെന്ററുകൾ, മറ്റ് അത്യാവശ്യ സേവന സ്ഥാപനങ്ങൾ എന്നിവ ബദൽ വൈദ്യുതി സംവിധാനങ്ങൾ ഒരുക്കണമെന്നും അധികൃതർ അറിയിച്ചു.
മഴക്കാലത്ത് വൈദ്യുതി വിതരണത്തിൽ തടസ്സങ്ങൾ കുറയ്ക്കുകയും ശൃംഖലയുടെ സുരക്ഷയും വിശ്വാസ്യതയും വർധിപ്പിക്കുകയും ചെയ്യുകയെന്നതാണ് ഈ പരിപാലന പ്രവർത്തനങ്ങളുടെ പ്രധാന ലക്ഷ്യമെന്ന് ബെസ്കോം വ്യക്തമാക്കി. ഉപഭോക്താക്കൾക്ക് അവരുടെ പ്രദേശത്തെ കൃത്യമായ വൈദ്യുതി മുടക്ക സമയം ബെസ്കോമിന്റെ ഔദ്യോഗിക അറിയിപ്പുകളിലൂടെയും ബന്ധപ്പെട്ട ഉപവിഭാഗ ഓഫീസുകളിലൂടെയും പരിശോധിക്കാമെന്നും കമ്പനി അറിയിച്ചു.
SUMMARY: Power outages in over 100 areas in Bengaluru today and tomorrow
